Projektligji për pensionet private në Shqipëru dhe greva në Greqi për projektligjin e ri të punës kanë zbritur në foltoren e Kuvendit nga deputeti socialist Erion Braçe.
Ky i fundit është ndalur te emigrantët shqiptarë në Greqi që sipas tij nuk po marrin dot një të drejtë themelore, që ka të bëjë me sigurimet shoqërore. Sipas Braçes, mes Shqipërisë dhe Greqisë nuk duhet të qëndrojë në mes çështja e Fredi Belerit, por ajo e emigrantëve shqiptarë dhe gjetja e një zgjidhje për këta të fundit.
“Emigrantët në Greqi s’po marrin një të drejtë themelore ndonëse u janë përgjigjur detyrimeve ligjore, sa i përket sigurimeve shoqërore. Edhe atë të punëdhënësit dhe atë të punëmarrësit. Kjo çështje as nuk diskutohet dhe ata njerëz atje meritojnë një përgjigje nga qeveria greke, ose paratë mbrapsh ose pension si gjithë të tjerët.
Ne politikën e vendit fqinj nuk e bëjmë dot, por atje ka disa punëtorë që merren me bujqësi, është e paimagjinueshme të lexoni mesazhet e shqiptarëve që s’marrin dot numër të sigurimit shoqëror sepse sistemi i tyre është i ngadaltë, burokratik.
Sot në Greqi ka grevë. Grekët kanë dalë në grevë për paratë e tyre, jo për Fredi Belerin. Sa kohë mes nesh dhe Greqisë do qëndrojë Fredi Beleri, zgjidhjen duhet ta japin punëtorët shqiptarë, sikurse grekët sot dalin në grevë, ashtu duhet ta bëjnë dhe punëtorët shqiptarë për të marrë paratë e tyre”, u shpreh Braçe.
