Ekonomia e Britanisë u “tkurr”’ në muajin shkurt pasi grevat e punonjësve publikë goditën prodhimin, por rritja në janar ishte më e fortë se sa mendohej fillimisht, që do të thotë se ka pak gjasa që të ndodhë një recesion. Prodhimi i Brendshëm Bruto ishte i pandryshuar në terma mujorë në shkurt, kundrejt parashikimit për një rritje prej 0.1%.
Por, Zyra për Statistikat Kombëtare – ONS – rishikoi vlerësimin e saj për rritjen e janarit në 0.4% nga 0.3% – që do të thotë se Britania ka të ngjarë të shmangë tkurrjen e tremujorit të parë që Banka e Anglisë parashikoi muajin e kaluar. Panorama më e gjerë ekonomike mbetet e dobët. Ndërsa anashkaloi recesionin për momentin, ekonomia e Britanisë ka ngecur gjatë vitit të kaluar.
Projeksionet e Fondit Monetar Ndërkombëtar të publikuara këtë javë treguan se Britania renditet në fund të ekonomive kryesore të botës për sa i përket rritjes ekonomike të pritshme në vitin 2023, me një tkurrje prej 0.3%, ekuivalente me një rënie prej 0.7% mbi bazën për frymë.
Ekspertët shprehen se shqetësimet për recesionin do të vazhdojnë të jenë të pranishme pasi taksat dhe kostot e huamarrjes më të larta kompensojnë rënien e inflacionit dhe mbështetjen e qeverisë për faturat e energjisë. Ata shtojnë se Banka e Anglisë duhet t’i japë fund ecurisë së rritjes së normave të interesit muajin e ardhshëm pasi rritja e normave do të dobësonte më tej perspektivat e rritjes së vendit.
Sektori i gjerë i shërbimeve u tkurr me 0.1% në shkurt, i dëmtuar nga grevat e mësuesve dhe punonjësve të tjerë të sektorit publik, por u kompensua nga një rritje në sektorin shumë më të vogël të ndërtimit. Rishikimi në rritje deri në janar do të thotë se ekonomia do të duhej të ishte tkurrur me 0.6% në mars për tremujorin e parë në tërësi për të treguar një tkurrje.
Ministri i Financave Jeremy Hunt tha se të dhënat treguan se performanca ekonomike e Britanisë kishte qenë më e fortë se sa mendohej. Shifrat treguan një rritje prej 2.4% në sektorin e ndërtimit – që përfaqëson rreth 6% të ekonomisë – e që ishte nxitësi i vetëm i rritjes ekonomike në shkurt.
Zyrtarët e ONS ia atribuan rritjen e në sektorin e ndërtimit një rikuperimi në shkurt nga ndërprerja e shkaktuar nga moti i keq në janar, veçanërisht në ndërtimet e reja dhe një rritjeje në sektorin e mirëmbajtjes dhe riparimit.
