Lara Gutt-Behrami ka fituar medaljen e bronztë në disiplinën e sllallomit të madh në Lojërat Olimpike Dimërore Pekini 2022 të hënën.
Skitarja zvicerane është bashkëshortja e futbollistit me prejardhje nga Kosova, Valon Behrami.
Në këtë disiplinë garoi sot edhe skitarja e Kosovës, Kiana Kryeziu, për të cilën Gutt Behrami është idhull i saj.
Ajo e zuri vendin e 49-të nga 82 garuese në sllallom të madh. Koha e saj pas dy lëshimeve ishte 2 minuta e 42.19 sekonda.
Ndërkohë, sot për Kosovën garoi me ski edhe Albin Tahiri, duke regjistruar kohë rekorde personale në lojërat dimërore.
Ai u rendit i 35-ti nga 43 garues, e cila është renditja e tij më e mirë në Lojërat Olimpike Dimërore.
Tahiri pati kohën 1 minutë e 52.44 sekonda.
Albini do të garojë edhe në disiplinat e kombinimit alpin, sllallomit dhe sllallomit të madh ditët në vijim.
