Këngëtari Erik Lloshi sapo është prezantuar me projektin e ri muzikor “Vajzë shqiptare”. “Kënga ka marrë gjashtë muaj për t’u realizuar. Është e kuruar deri në detaj”, tregon Erik Lloshi në një intervistë për gazetarin Andri Xhahu në Radio Tirana 1. “Tekstin dhe muzikën e ka shkruar Edlir Begolli. Jam me fat që punoj me të.”
“Vajzë shqiptare” është një këngë moderne me ritme folk. Këngëtari shprehet se kohët e fundit ka dëgjuar shumë këngë me tupana. “Jam me fat që isha i pari që xhirova me tupana dhe i vetmi që xhirova te Piramida e re sepse nuk lejohet më të xhirohet pasi është shndërruar në qendër kulturore.”
Kënga i kushtohet vajzave shqiptare, dhe Eriku e ka një shqetësim. “Duke e ditur që unë nusen e kam nga Bosnja dhe kënga flet për vajzat shqiptare, kisha frikën që do të më godasin në media. Romina është me origjinë nga Bosnja por me pasaportë është shqiptare.”
I pyetur për historinë e tyre të dashurisë, Eriku tregon se nuk ka qenë dashuri me shikim të parë. “Historia me Rominën është shumë e bukur. Jam dashuruar jo me shikimin e parë. Nuk besoj në dashurinë me shikim të parë. Unë besoj në pëlqim me shikim të parë. Jam dashuruar me sjelljen e saj, me dashurinë dhe kujdesin që më ka falur. Ka bërë shumë për mua në të mirë dhe në të keq.”
Projekti i ri muzikor ka ecur mjaft mirë duke arritur më shumë se gjysmë milioni klikime vetëm në pak ditë. “Kënga është e dëgjuar në të gjithë Diasporën. Në Kosovë ka bërë namin dhe po vendoset në rrugët e Kosovës gjatë paradave kuqezi. Deri tani kam hedhur një mijë dollarë sponsorizim. Do hedh dhe tre mijë të tjera për sponsorizim. Pra video del si sugjerim por jo blerje klikimesh.”
Në lidhje me raportin mes artistëve, Erik Lloshi tha: “Është buzëqeshje cinike, jo e sinqertë. Janë postime jo të sinqerta, sa për të bërë qokën, siç kam bërë edhe unë. U kam kërkuar suport shumë artistëve, sepse ne kemi nevojë për njëri-tjetrin. Ata që nuk më kanë mbështetur janë Luiz Ejlli, të cilin unë e kam mik, Fifi, të cilën e kam shumë mikeshë dhe Yll Limani, i cili kur unë isha në majë ia kam dhënë suportin. Po kështu Luizit dhe Fifit.”
Këngëtari tregon se nuk ndihet i zhgënjyer prej tyre. “Bota është e rrumbullakët. Sot kam unë nevojë për ta, nesër kanë ata nevojë për mua. Nuk e kutpoj këtë vetëkënaqësi dhe delirin që kanë. Pse duhet ta kesh? Të njeh një Shqipëri e tërë? Edhe mua më njeh një Shqipëri e tërë, por mos harro se çfarë kam bërë unë për ty dikur.”
Në mbyllje të intervistës, Eriku zbuloi se ka dhe katër këngë të tjera për të publikuar, sërish në bashkëpunim me Edlir Begollin. “Është një duet me Eranda Libohovën, që mezi pres ta publikoj. Flet për dy të dashuruar që nuk lejohen të jenë me njëri-tjetrin. Eranda është një nga artistet më të mira për mua. Kam dhe një super baladë ku do të dal në origjinën time. Është edhe një trio shumë e fortë por nuk mund të zbuloj më shumë.”
