“Ndryshimi i sistemit zgjedhor është një nga kushtet e opozitës parlamentare”, deklaroi sot deputetja e opozitës Rudina Hajdari.
Gjatë një interviste televizive, Hajdari e cila drejton Komisionin e Posaçëm për Reformën Zgjedhore së bashku me deputetin e PS, Damian Gjiknurin, tha se pas një jave do të hapet një diskutim nëse është e nevojshme që të ndërhyjmë në sistem.
Duke theksuar se është pro një sistemi me lista të hapura, Hajdari tha se do ishte dakord edhe për një sistem proporcional, por me lista të hapura.
“Ne do ndjekim hap pas hapi kalendarin që kemi propozuar dhe siç e keni dëgjuar mirë ndoshta nuk ishte në pëlqimin e mazhorancës një tryezë që diskuton sistemin. Do hapet një diskutim nëse është e nevojshme që të ndërhyjmë në sistem. Mazhoranca dhe opozita jashtë parlamentit mund të jenë skeptike dhe kuptohet qartë se pse sepse duhet ta kenë çdo gjë në dorën e tyre”, tha Hajdari.
Sipas saj, ndryshimi i sistemit është një nga kushtet e opozitës në parlament. Hajdari tha se nëse mazhoranca dëshiron që të ketë një sistem më përfaqësues ndaj qytetarëve, që të kenë një cilësi më të mirë të deputetëve, të kryetarëve të bashkive, të kemi një Kod Zgjedhor më të fortë përsa i përket pastrimit të figurave. Ka shumë hapësira për ndryshim. Mund të shkojmë drejt një sistemi që është më i denjë për përfaqësimin e popullit shqiptar”.
“Personalisht preferoj listat e hapura. Do preferoja nëse do kishim një sistem miks ose proporcional, por me lista të hapura. Kjo nuk varet vetëm nga Rudina, kjo varet nga shumë faktorë dhe do shikojmë se cili është sistemi më i gjithëpranuar nga të gjithë”, deklaroi Hajdari./ATSH/
