nga Sokol Pepushaj
Këtë vjeshtë, në një fije të hollë peri prej leshi po mbahen të gjithë ata që po, do të shkojnë për lesh…
Gjergj Fishta do të shkruante; prokurori Altin Dumani ka humbur rrugën nëpër dosje e germa të ndërthurura në pyllin e errët të korrupsionit, nuk ka faj qyqari.
E mjera drejtësi ka sëmundje ngjitëse.
Adriatik Llalla ia ngjiti Arben Krajës kompromisin me situatat nëpër kuadratet e rrethuara nga Edi Rama, Sali Berisha dhe Ilir Meta, e më vonë, vetë Beni, infektoi edhe Altin Dumanin, duke i mbyllur tapën në shishen e plot helm që mbante ambasadorja Yuri Kim në çantën e dorës.
Me dorën e vet, kishte shkruar një vëllim voluminoz me emra të dyshimtë, që përmbi dyshemenë e varfërisë, kishin ngritur perandori pushteti e pasurie.
Mund të fillohej me cilindo nga investitorët strategjikë, me Saliun, Ilirin, Bablokun apo “maçokët” e tyre ministra, kryebashkiakë, deputetë, zyrtarë të lartë, se këta janë hajdutët e mëdhenj, apo jo?!
Por seleksionimin për burg nuk po e bën ende drejtësia.
SPAK-u e ka gjoksin me shënja nga “grushtet” e rrëmujshëm të rrëmujxhinjve që qarkullojnë me çanta me para e makina luksoze nëpër dosje të trasha, sa nxjerrin nga qarkullimi logjik edhe ambasadorët, e janë bërë për t’i vajtuar sa tek koshat e plehrave, sa tek anijet e peshkimit e tezgat e bananeve.
Bananet dhe peshqit bien erë droge.
E droguar është edhe rezistenca antiamerikane nëpër kodrat ku mediat meditojnë figuracione të shprishura nga lëmshi i akullt që pritet të shkrijë në vjeshtë.
Këtë vjeshtë, në një fije të hollë peri prej leshi po mbahen të gjithë ata që po, do të shkojnë për lesh…
Po as durimi nuk duron për gjatë, ndaj të gjithë janë në dilemën, ç’po ndodh, është ngatërruar radha e VIP-ave për në burg, apo hajdutët që paguajnë më shumë prishin radhën e burgut?!
