Kandidati i Lëvizjes Vetëvendosje në Komunën e Obiliqit, Halil Thaçi, është i vetmi garues në Zgjedhjet Lokale në Kosovë që ka arritur të përmbysë rezultatin nga raundi i parë i zgjedhjeve.
Në raundin e parë, Thaçi kishte dalë i dyti, duke marrë 44.37 për qind ose 5,626 vota. Ai kishte një dallim prej mbi 2 për qind nga kundërkandidati Xhafer Gashi i Lidhjes Demokratike të Kosovës, i cili kishte dalë i pari me 46.20 për qind, përkatësisht 5,859 vota.
Nga 18 komunat që shkuan në balotazh, me kandidatët që kishin dalë të parët në raundin e parë, vetëm Halil Thaçi ka arritur të bëjë përmbysje rezultati.
Kandidati i LVV-së ka arritur që në këtë raund, të zhvilluar më 9 nëntor, të marrë 6,441 vota ose 51.09 për qind, ndërsa Gashi i LDK-së, që kishte dalë i pari në raundin e parë më 12 tetor, në balotazh mori 6,167 vota ose 48.91 për qind.
Kështu, Thaçi do të jetë kryetar i Obiliqit për katër vitet e ardhshme, ndërsa Lëvizja Vetëvendosje ka fituar gjithsej shtatë komuna në këto zgjedhje – një rritje prej tri komunash krahasuar me zgjedhjet e vitit 2021.
5 minutes ago
