Izraeli njoftoi të martën se kishte marrë nga Kryqi i Kuq eshtrat e një pengu të ndjerë, i mbajtur nga militantët palestinezë në Gaza, ndërsa trupat e dy pengjeve të tjera ende nuk janë gjetur pas më shumë se gjashtë javësh nga hyrja në fuqi e një armëpushimi të brishtë.
Zyra e kryeministrit izraelit nuk e bëri publik emrin e ish-pengut, duke sqaruar se eshtrat do t’i dorëzohen Qendrës Kombëtare të Mjekësisë Ligjore për identifikim.
Ky zhvillim lidhet me marrëveshjen e tetorit mes Hamasit dhe Izraelit, pas dy vitesh lufte shkatërruese. Sipas paktit, Hamasi liroi 20 pengjet e mbijetuara në këmbim të gati 2,000 të burgosurve palestinezë dhe të paraburgosurve të kohës së luftës të mbajtur nga Izraeli.
Marrëveshja gjithashtu parashikonte kthimin e eshtrave të 28 pengjeve në këmbim të eshtrave të 360 militantëve palestinezë.
Ndërkohë, televizioni egjiptian Al-Qahera News raportoi se qeveria e Kajros kishte organizuar një takim pasues për ndërmjetësit dhe garantuesit e armëpushimit.
Në takim morën pjesë kreu i inteligjencës së Egjiptit, kryeministri i Katarit dhe kreu i inteligjencës turke. Ata diskutuan për zbatimin e fazës së dytë të planit 20-pikësh të Presidentit të SHBA-së, Donald Trump, për Gazën e pasluftës, si dhe për kapërcimin e sfidave që lidhen me shkeljet e armëpushimit.
Burimet raportojnë se një delegacion i Hamasit, i kryesuar nga kreu i tij në mërgim Khalil Al-Hayya, ka zhvilluar bisedime me zyrtarë egjiptianë në Kajro gjatë dy ditëve të fundit.
Diskutimet janë fokusuar në hapat e mëtejshëm të planit të Trump, i cili parashikon krijimin e një autoriteti qeverisës kalimtar për Gazën dhe vendosjen e një force sigurie shumëkombëshe.
Që prej hyrjes në fuqi të armëpushimit më 10 tetor, Izraeli dhe Hamasi kanë shkëmbyer akuza për shkelje vdekjeprurëse të tij, duke fajësuar njëri-tjetrin për pengimin e hapave të mëvonshëm të kërkuar nga plani amerikan. Situata mbetet e paqëndrueshme, ndërsa përpjekjet diplomatike vazhdojnë për të konsoliduar paqen dhe për të gjetur një zgjidhje afatgjatë për Gazën.
