Twitter po ndërmerr një veprim ligjor kundër Meta-s pas hapjes së aplikacionit Threads.
Threads, i cili u lançua të mërkurën është i ngjashëm me Twitter dhe është mirëpritur nga përdoruesit e Meta-s. Më shumë se 30 milionë njerëz janë regjistruar për aplikacionin e ri, sipas Meta.
Në një lëvizje të raportuar fillimisht nga gazeta Semafor, avokati i Twitter, Alex Spiro i dërgoi një letër CEO-s të Meta, Mark Zuckerberg të mërkurën, duke akuzuar Metën për “keqpërdorim sistematik, të qëllimshëm dhe të paligjshëm të sekreteve tregtare të Twitter dhe pronave të tjera intelektuale” për të krijuar Threads.
Konkretisht, avokati pretendoi se Meta kishte punësuar dhjetëra ish-punonjës të Twitter, të cilët “kishin dhe vazhdojnë të kenë akses në sekretet tregtare të Twitter dhe informacione të tjera shumë konfidenciale” që në fund e ndihmuan Metën të zhvillonte atë që ai e quajti aplikacionin “copycat” Threads.
“Twitter synon të zbatojë rreptësisht të drejtat e tij të pronësisë intelektuale dhe kërkon që Meta të ndërmarrë hapa të menjëhershëm për të ndaluar përdorimin e çdo sekreti tregtar në Twitter apo informacione të tjera tepër konfidenciale. Twitter rezervon të gjitha të drejtat, duke përfshirë, por pa u kufizuar në, të drejtën për të kërkuar si mjete juridike civile ashtu edhe masa ligjore pa njoftim të mëtejshëm”, thuhet në letër.
Elon Musk i Twitter është shprehur se “konkurrenca është e mirë, mashtrimi nuk është” por Meta mohoi pretendimet në një letër ligjore se ish-stafi i Twitter-it ndihmoi në krijimin e Threads. Në Threads, zëdhënësi i Meta, Andy Stone, postoi se “askush në ekipin inxhinierik të Threads nuk është një ish-punonjës i Twitter.
Të dy Musk dhe Zuckerberg e kanë pranuar rivalitetin mbi Threads, i cili është i lidhur me Instagram, por funksionon si një aplikacion i pavarur.
Menjëherë pas kësaj, dhe ndërsa fjala “Threads” u përhap globalisht në platformën e tij, Musk tha: “Është pafundësisht e preferueshme të sulmohesh nga të huajt në Twitter, sesa të kënaqesh me lumturinë e rreme të Instagram-it të fshehtë”.
Si funksionon Threads?
Në Threads, postimet mund të ndahen në Instagram dhe anasjelltas dhe mund të përfshijnë lidhje, foto dhe video deri në pesë minuta. Megjithatë, disa përdorues të hershëm të mërkurën raportuan probleme gjatë ngarkimit të imazheve. Përdoruesit shohin një burim postimesh, të cilat Meta i quan “threads”, nga njerëzit që ndjekin si dhe përmbajtjet e rekomanduara.
Ata janë në gjendje të kontrollojnë se kush mund t’i “përmendë” ata dhe të filtrojnë përgjigjet për postimet që përmbajnë fjalë specifike. Mosndjekja, bllokimi, kufizimi ose raportimi i profileve të tjera është gjithashtu i mundur, dhe çdo llogari që përdoruesi bllokon në Instagram bllokohet automatikisht në Threads.
