Kandidati i koalicionit AAK-PSD për kryeministër të vendit, Ramush Haradinaj, në Interaktiv të KTV-së ka folur për konkurrentët e tij për këtë post.
Kur ka folur për kandidaten e LDK-së, Vjosa Osmani, Haraindaj ka thënë se ka respekt për të.
“E respektoj Vjosën, LDK-ja ka bërë një veprim shumë të mençur me nomiminin e saj. Por krejt Kosova nuk është LDK, fatmirësisht jetojmë në demokraci”, ka thënë Haradinaj në Interaktiv.
“Kisha pritur prej cilido kandidat që hynë, që në këto temat e interesit nacional të ruhen, edhe në fushatë. Për shembull çështja e taksës duhet të sqarohet nga secili kandidat. Nëse ja jep tregun Serbisë, çka ofron për ta marrë njohjen”, ka thënë Haradinaj.
Ai ka thënë se do të ishte mirë që një grua të jetë kryeministre, por përtej këtij fakti, Haradinaj ka thënë se duhet të shikohet se çfarë agjende ka ajo si kandidate.
“Unë shoh që do të vijnë tema të rënda, e me këtë nuk po them se një grua apo një burrë, sepse kemi parë që edhe burrat nuk kanë mundur të marrin vendime”, ka thënë ai.
E duke folur për LDK-në, Haradinaj ka thënë se kjo parti është investuese në këtë gjendje që e kemi në Kosovë.
“Nuk e kuptoj se si mundet LDK-ja të flasë se sa keq është gjendja sot në Kosovë. Janë ata që e kanë bërë Hashim Thaçin president e herën e parë Kadri Veselin kryetar Kuvendit”, ka thënë Haradinaj.
Duke folur për Albin Kurtin, Haradinaj ka thënë se për të “s’ka vërejtje në aspektin teorik, por është larg realitetit”.
“Në aspektin teorik, s’kam vërejtje. I thotë gjërat bukur, por jeta është më reale, qeverisja është më reale. Nuk po duken bindës. Është vështirë të realizohen ato që po i thonë. Kam pak kohë në qeverisje dhe kam pa sfidat. Kam pa se si arrihet deri te një rezultat. S’kam pa që këta i shohin mirë këto”, ka thënë ai.
Sa i përket VV-së, Haradinaj thotë se sheh shumë lëkundje në doktrinën e tij.
“Prej luftimit të korrupsionit, e te bashkimi kombëtar që është lënë si pak si anash, e tash kanë dalë me të tjera agjenda”, ka thënë Haradinaj.
Sa i përket Kadri Veselit me të cilin ishin në koalicion së fundmi, Haradinaj ka thënë se ai ka paqëndrueshmëri.
“Veselit ia atribuoj një paqëndrueshmëri. Në momentet kyçe s’ka qëndrueshmëri. Duhet ta mendojë këtë. Jam dëmtuar nganjëherë nga kjo paqëndrueshmëri e tij, PDK-së dhe presidentit”, ka deklaruar Haradinaj më tej që ka komentuar edhe moton e PDK-së për këto zgjedhje për “luftën kundër korrupsionit”.
“Si kemi arritur qe 20 vjet te korrupsioni? Nëse themi po e luftojmë, a bën një analizë çka është korrupsioni, si u bë, nga erdh. Duhet një diagnozë para se të luftohet një sëmundje. Tash PDK e LDK duket sikur kanë ardhur nga qielli. Ka dëshira të gjithë që të shfajësohen. Sikur po fundoset një anije. I ka zënë gabim dorëheqja ime e të gjithë po mundohen t’i ikin përgjegjësisë. Sa ditë keni qeverisur aq jeni përgjegjës për gjendjen ku jemi”, ka thënë Haradinaj.
“Nuk mund të them se edhe koalicioni jonë me PDK-në ka qenë parimor”, ka shtuar ai.
Ai ka thënë se për Limajn ka respekt.
“Është dashur bisedat të avancojnë më shpejtë, por ata i mbyllën. Jemi të hapur i mirëpresim në çdo kusht. S’kemi vërejtur. Por s’e vazhdojmë tutje në pritje të një koalicioni”, ka thënë ai.
Ai ka thënë se me të gjithë kandidatët do të pranonte të dilte në debat publik.
“Me shumë respekt për besë. Vetëm me një nuk do të dilja, por kur janë të gjithë do të dalë, pa problem”, ka thënë Haradinaj.
