Kryeministri Ramush Haradinaj, i cili javën e kaluar ishte në vizitë zyrtare në Berlin, ku është pritur nga kancelarja gjermane Angela Merkel, ka folur për detajet dhe rëndësinë e këtij takimi.
“Mendoj se është me rëndësi ta konfirmojmë që marrëdhëniet mes Kosovës dhe Gjermanisë kanë arritur një nivel më të lartë të tyre. Është një marrëdhënie dhe situatë e re”, ka thënë Haradinaj në Klan Kosova.
“I kemi trajtuar të gjitha temat dhe zakonisht bëjmë kujdes se si i elaborojmë ato. Ka lajme të mira për Kosovën. Një nivel i tillë i marrëdhënieve Kosovë-Gjermani së pari e përshpejton liberalizimin e vizave dhe ndikon drejtpërdrejtë në këtë temë, por pastaj edhe në aspektin rajonal, bilateral me Gjermanisë si dhe në rrugën e integrimeve evropiane ndikon pozitivisht”, tha ai.
Pas takimit me kancelaren Angela Merkel, kryeministri Ramush Haradinaj tha se pret lajme të mira së shpejti për këtë temë.
“Është mënyrë e të shprehurit sepse e di që si Kosovë e kemi punën mirë për liberalizimin e vizave. Duhet të jemi serioz dhe të vazhdojmë të mbetemi në temë. Kam kufizimet e mia sa mund të flasë dhe mund të hyjë në detaje në këtë etapë, por mund t’iu siguroj se e kemi punën mirë për liberalizimin e vizave. Nuk do të shkojë fare larg deri te marrja e njoftimeve të caktuara”, tha ai dhe shtoi se “jemi në proces dhe po punojmë. Jemi palë serioze, nuk do të na trajtonte Gjermania në atë nivel të marrëdhënieve sikur të mos ishim palë serioze”.
“Mënyra e pritjes është një ndihmë e jashtëzakonshme në çdo dimension të marrëdhënieve tona, qoftë në rajon apo edhe në Evrope. Një trajtim i tillë prej kancelares Angela Merkel ndikon edhe te vendet e rajonit”.
Por, kur do të mund të lëvizin kosovarët pa viza në vendet e Bashkimit Evropian, Haradinaj nuk ka theksuar se “nuk flasim për vitin tjetër, punojmë për këtë vit”.
“Nuk është optimiste, është bukur reale tash. Do të kemi lajme të mira së shpejti. Janë disa vështirësi. Ne po bëjmë përpjekje të mos krahasohemi me asnjë temë, por të jemi temë në vete”, tha ai.
