Jeta e një aktori është e mbushur me famë dhe para, por ka edhe të këqijat e saj, si për shembull fakti që duhet të qëndrojë për periudha të gjata larg familjes.
Kjo është arsyeja që aktorët shpesh dalin në pension para kohe. Një prej tyre është edhe Bryan Cranston, protagonisti i serialit “Breaking Bad”, i cili ka bërë me dije se do të tërhiqet së shpejti nga aktrimi.
I njohur për rolin e tij si Walter White, ose “Heisenberg”, në një intervistë për “GQ”, 67-vjeçari tha se do të tërhiqet në vitin 2026 dhe arsyeja është se dëshiron të kalojë më shumë kohë me gruan e tij.
“Gjatë 24 viteve të fundit, gruaja ime e ka bazuar jetën e saj sipas jetës sime. E ka përshtatur jetën e saj në funksion të asaj që bëja unë. Sigurisht që ka pasur të mirat e veta si, por nuk është e drejtë. Dua ta ndryshoj këtë gjë sepse ajo e meriton”, tha Cranston.
Gjithashtu, aktori e ka menduar edhe ku do ta kalojë pensionin: “Dua të jetoj në ndonjë fshat francez, të mësoj gjuhën, të gatuaj, të bëj xhiro çdo ditë dhe të ndez zjarrin në darkë. Dua të pi verë dhe të mos lexoj më skenarë”.
