Manuel Lokateli tashmë është i detyruar që të marrë në dorë frenat e repartit të mesfushës, duke qenë se dënimi i Pol Pogbasë pas pozitivitetit me doping, ashtu sikurse ai i Nikolo Faxholit për çështjen e basvënies, ka shkurtuar shumë forcat në shtyllën kurrizore të skuadrës, kështu që i takon italianit që të kërkojë dhe të pranojë më shumë përgjegjësi.
Dhe ndoshta mesazhin ai jo vetëm që e kishte marrë të qartë, por në të njëjtën kohë dha edhe sinjalin se ishte më shumë se gati për ta bërë këtë ndaj Milanit, ku goli i tij solli tri pikë me peshë. Për më shumë, në të njëjtën datë që 7 vite më parë, ai i shënonte me bluzën e Milanit veshur Juventusit dhe sërish ofronte fitoren 1-0.
Manuel, janë shuar emocionet e fitores me Milanin?
Sigurisht që ishte një fitore e cila mund të na ofrojë një kthesë tepër të rëndësishme në kampionat, pasi tri pikë në “San Siro” kanë gjithmonë jo vetëm një kënaqësi të veçantë, por një peshë të madhe, sepse po flasim për skuadrën që u shpall kampione 2 vite më parë dhe sivjet jo vetëm kanë bërë një merkato të rëndësishme, por kundër nesh vinin si kryesues të Serisë A.
Ligji i ish-it goditi sërish, po na thoni, kush ju ka shijuar më shumë, goli që i shënuat Juves si milanist apo ky që i shënuat Milanit si juventin?
Unë e kam thënë që kam qenë që në moshë të vogël një tifoz i flaktë i Juventusit dhe si çdo fëmijë që nis të luajë futboll, ëndrra është që të luajë në skuadrën që ai bën tifozllëk. Dhe pa dyshim që arritja te Juventusi është objektivi im i parë më i rëndësishëm.
Po na e thuaj pra, kë shijuat më shumë?
Ai me bluzën e Milanit kishte një shije të bukur sepse ishte goli im i parë si profesionist dhe më bëri që të njihesha pak më shumë. Por ky si juventin ka jo vetëm një shije më të bukur, por në të njëjtën kohë më detyron që të kem edhe më shumë përgjegjësi në vazhdim, duke parë edhe me problemet që na është dashur që të përballemi në këtë fillimsezoni.
Besoni se ky do të jetë sezoni juaj, duke parë mungesat e Pogbasë dhe Faxholit?
Nuk e di nëse do të jetë, por ajo që di është se duhet të jetë. Edhe në fillim të fazës përgatitore, në intervistën time të parë unë e thashë se ka ardhur radha që unë të marr më shumë përgjegjësi, pasi te Juvja kërkohet shumë më shumë nga sa kisha bërë dhe e kam kuptuar këtë. Dhe mendoj se sivjet kam bërë edhe një përgatitje më ndryshe, por mbi të gjitha psikologjikisht nuk kam më frikë që të marr përsipër më shumë përgjegjësi. Dhe jam gati që të kem edhe më shumë në vazhdim. Madje, mund të garantoj se do të jetë deri në fund një sezon shumë “loca” (i çmendur)…
Aq përgjegjësi sa të besoni se mund të fitoni titullin kampion? Por ta dini që Alegrit nuk i pëlqen shumë kur përmendet kjo gjë?
Kur unë nuk kam frikë që ta them se ky duhet të jetë gjithmonë një objektiv për Juventusin. Këtë na e detyron fanella që mbajmë veshur, na e detyron historia, ndonëse trajneri ynë me të drejtë kërkon që pas disa fitoreve dhe një renditjeje mëse komode deri tani, të na mbajë të përqendruar. Dhe pa dyshim që rikthimi në Champions është jetik për një klub si ne, pasi kjo është më minimalja e minimales që i detyrohemi tifozëve tanë.
