Një prej kanaleve televizive më prestigjoze të Hollandës, “AvroTros”, zgjodhi ta nisë me Shkodrën puntatën e parë të emisionit të famshëm “Kush është i infiltruari”, që shënon edicionin e tij të 22-të.
Edhe pse Shqipëria nuk e ka të zhvilluar politikën e filmit, ajo mbahet si një nga pikat kryesore të kontaktit për produksionet e huaja që vijnë në Shqipëri për të xhiruar.
Marrëdhënie të tilla jo vetëm ndihmojnë vendin në aspektin financiar, por edhe promovojnë Shqipërinë jashtë kufijve.
Pikërisht këtë ka bërë edhe grupi i xhirimit që filmoi në vendin tonë 12 seri për sezonin e ri, duke e nisur me kalanë “Rozafa”.
Programi reality-show, bazohet te emisioni mëmë “De Mol” i televizionit belg VRT, nisur fillimisht në vitin 1998.
Ai vë në garë të paktën 10 konkurrentë të cilëve u kërkohet të kryejnë sprova në mënyrë që të arkëtojnë të ardhura.
Por mes tyre është një i infiltruar, i cili ka për detyrë ta sabotojë grupin. Ata duhet ta zbulojnë të infiltruarin.
Çdo vit produksioni i “Kush është i infiltruari” zhvendoset nëpër botë. Në të shkuarën kanë qenë në Australi, SHBA, Kinë, Sri Lanka, Meksikë etj.
Këtë edicion ata ishin në Shqipëri dhe episodi i parë u transmetua më 1 janar 2022.
Teksa transmeton një pjesë të këtyre xhirimeve, kryeministri Edi Rama thotë se ky program do të ndikojë në rritjen e numrit të turistëve holandez në Shqipëri.
“Nga Shkodra nisi Viti i Ri i ekranit holandez me programin e famshëm “Wie is de Mol”, filmuar në Shqipëri në 2021. Emisioni më i ndjekur televiziv në Holandë ka befasuar publikun me bukuritë shqiptare, çka pritet të rrisë ndjeshëm këtë verë numrin e turistëve holandezë në Shqipëri”, shkruan Rama.
11 yjet holandeze, të cilët xhiruan seritë në Shqipëri, janë artistë të njohur, prezantues televizivë, aktorë, krijues, gazetarë, shkrimtarë, këngëtarë.
Për Shqipërinë kjo është një mundësi fantastike promovimi si për turizmin, po ashtu edhe për imazhin.