Përmes një postimi në Facebook kryeministri Avdullah Hoti ka thënë se programi për rimëkëmbje ekonomike po merr përkrahjen e domosdoshme, “prandaj edhe e kemi shtuar aktivitetin për futjen e 1.2 miliard eurove në treg”.
Ai ka shtuar se për jetësimin e këtij programi sigurisht se është e nevojshme edhe mbështetja nga donatorë të jashtëm.
“Prandaj jam i lumtur të ju njoftoj se sot, në dy video konferenca të ndara, mora mbështetje nga Presidenti i Bankës Evropiane për Ndërtim dhe Zhvillim Suma Chakrabarti dhe Linda Van Gelder, drejtoreshë rajonale e Bankës Botërore”, ka shkruar Hoti.
Derisa Zyra për Komunikim Publik e Kryeministrit bën të ditur se Hoti dhe ministrja e Financave, Hykmete Bajrami, biseduan sot me presidentin e Bankës Evropiane për Rindërtim dhe Zhvillim, Suma Chakrabarti.
“Me këtë rast, kryeministri Hoti dhe ministrja Bajrami e falënderuan Chakrabartin për përkrahjen e vazhdueshme të BERZH-it për Republikën e Kosovës, me theks të veçantë në kredinë emergjente për likuiditet me vlerë prej 30 milionë eurosh, si dhe për mbështetjen e projekteve të kompanive rajonale, mbështetjen për ndërmarrjet e vogla dhe të mesme etj”, thuhet në njoftim.
Tutje bëhet e ditur se gjatë këtij bashkëbisedimi, Hoti tha se takimet e kësaj jave në Uashington dhe në Bruksel do të përqendrohen kryesisht në integrimin ekonomik rajonal të vendeve të Ballkanit Perëndimor, ndërsa ministrja Bajrami paraqiti prioritetet e Qeverisë së Kosovës për rimëkëmbjen ekonomike të vendit.
