Kryeministri Avdullah Hoti, në konferencën e mbajtur sot, ka thënë se në dialogun me Serbinë nuk do të bisedojnë për integritetin territorial.
Ai në konferencë për media pas kthimit nga Brukseli ka thënë se ka koordinim të ngushtë ndërmjet Uashingtonit dhe qendrave evropiane.
“Sa i përket vizave është me interes që ka një mirëkuptim nga ana e komisionit dhe parlamentit se ne i kemi plotësuar kushtet. Janë tri vende që janë më skeptike por ne do të punojmë me to. Unë nuk do të jap datë për vizat sepse kjo nuk varet prej nesh. Në publik duken si takime te ndara. Nuk janë të ndara. Ka koordinim të ngushtë dhe të plotë ndërmjet Uashingtonit dhe qendrave evropiane. Nuk bisedojmë për integritetin territorial dhe sistemin unitar”, ka thënë ai.
Kryeministri Hoti, ka theksuar gjithashtu se nuk ka dyshime se kush e kryeson delegacionin në Washington.
“Besoj se duhet të jemi të vetëdijshëm me situatën e re që është krijuar. Se kush merr pjesë i takon nikoqirit të takimit por sa i përket procesit të dialogut nuk ka pasur asnjëherë dyshime se kush e kryeson delegacionin dhe kush flet në emër të Kosovës sa i përket dialogut”, shtoi Hoti.
Kryeministri Hoti tha se në të gjitha takimet që ka zhvilluar në Bruksel, theksoi se dialogu s’ka alternativë dhe se përmbyllja e këtij procesi, është në interes të Kosovës.
“Për dialogun, pavarësisht ndryshimeve mbesim të përkushtuar për dialogun sepse dialogu nuk ka alternativë. Këtë e kemi treguar në Bruksel. Është në interesin tonë që ky proces të përmbyllet sa më shpejtë. E kemi shtyrë vizitën në Washington, pas diskutimeve me Grenellin jemi dakorduar për një datë tjetër së shpejti. Agjenda mbetet e njëjtë që t’i jepet shtysë dialogut përmes një agjende ekonomike. Tani janë duke u bërë angazhimet për samitin e Parisit. Jemi të nderuar që kemi një fokus kaq të madh të presidentit francez dhe kancelares gjermane”, tha Hoti.
Hoti ka komentuar edhe propozim-aktakuzën ndaj presidentit Hashim Thaçi dhe Kadri Veselit.
“Zhvillimet politike dhe ato të fundit që kanë ndodhur e kanë ndërruar pak dinamikën e qeverisë tonë pas dorëzimit të aktakuzës nga Specialja. Lufta çlirimtare është arritja më e madhe për të fituar pavarësi. Kjo luftë është e shenjtë dhe shpallja e pavarësisë e legjitimon luftën. Duhet ta respektojmë rezufimin e pafajësisë derisa nuk ka një vendim. Duhet të tregojmë maturi për të respektuar obligimet tona kushtetuese dhe ndërkombëtare”, tha Hoti.
