Zëvendëskryeministri Enver Hoxhaj, ka reaguar pas deklaratave të ish-kryeministrit të Shqipërisë Sali Berisha i cili ka thënë se presidenti i Kosovës Hashim Thaçi dhe kryeministri i Shqipërisë Edi Rama, janë projektues të planit për ndarjen e Kosovës.
Hoxhaj përmes një statusi në Facebook, ka thënë se akuzat e tilla rrënojnë kontributin e Berishës dhënë për Kosovën në të kaluarën.
Reagimi i Hoxhajt:
Çdo herë kam pasur konsideratë të lartë për Sali Berishën, si një politikan me të cilin kam bashkëpunuar në pozita të ndryshme që kam mbajtur në Qeverinë e Kosovës. E kam parë si njeri të parimeve, të së vërtetës dhe të virtytit.
Mjerisht, pikëpamjet e tij të kohëve të fundit me frymë përçarëse dhe me ngjyra të errëta për t’i bërë akuzat e tij të padrejta dhe sinqeritetin selektiv të duken të vërteta, janë koncentrat i hipokrizisë dhe po e rrënojnë kontrubutin e tij dhënë në të kaluarën për Kosovën.
Fatkeqësisht, debatin e politikës ditore në Shqipëri po përpiqet ta bartë edhe në Kosovë, duke shprehur një mendësi totalitare për ndarjen se kush është tradhtar dhe hero.
Përmbyllja e shtet-ndërtimit të Kosovës me njohje të ndërsjellët Kosovë – Serbi dhe me ulëse për Kosovën në OKB është konsolidim i jashtëm edhe i Shqipërisë dhe një faktor i fuqizimit të shqiptarëve në rajon. Për tema të tilla Kosova dhe Shqipëria kanë nevojë për një dialog ndërshqiptar.
