Enver Hoxhaj, ish-zëvendës i Ramush Haradinajt në kabinetin e kaluar qeverisës, ka thënë se ky i dyti në qeverisje e ka izoluar Kosovën.
“Nuk ka dyshim. Në Qeverinë që edhe unë kam marrë pjesë numri i vizitorëve që kanë ardhur ka qenë më i vogli”, ka thënë Hoxhaj në Interaktiv të KTV-së.
Duke u përgjigjur në kritikën e Haradinajt për servilizëm të Kadri Veselit ndaj ndërkombëtarëve, Hoxhaj ka thënë se “deklaratat e tilla më shumë shkojnë në frymën e asaj që dikujt në një skaj të Kosovës t’i zgjohet një ndjenjë e të kaluarës”.
“Të jem i qartë, interesi i Kosovës është në linjë me interesin e SHBA-së dhe me Bashkimin Evropian”, ka thënë Hoxhaj, duke shtuar se kushdo që mendon ndryshe, e ka gabim.
“Natyrisht që me taksën e kemi goditur Serbinë. Por diskutimi për taksën do të marrë formë kur të formohet Qeveria e re”, ka thënë ai.
Hoxhaj – që vazhdimisht ka thënë se ka qenë ai ideator i vënies së tarifës 100 për qind për mallrat nga Serbia dhe Bosnjë e Hercegovina – ka thënë se Kosova duhet ta kushtëzojë heqjen e taksës me një deklaratë publike të Serbisë se e pezullon fushatën për çnjohjen e Kosovës.
Ai ka thënë se Qeveria Haradinaj nuk e ka listën e gjatë të vendimeve të mëdha siç kishte premtuar.
Duke u përgjigjur në pyetjen se Haradinaj po thotë se e ka ndaluar ndarjen e territorit, Hoxhaj ka deklaruar: “Me çfarë? Me deklarata? Çfarë veprime? Çfarë ka ndodhur që ka parandaluar ndarjen?”
Hoxhaj ka përsëritur se nëse opozita e atëhershme, e përbërë nga AAK-ja, VV-ja e Nisma, nuk do të bënin bllokimin e votimit të demarkacionit, liberalizimi do të ndodhte më 2016.
“Për tema të mëdha duhet të kemi pajtim. Nëse ka tema të mëdha ku këta s’kanë merita është liberalizimi i vizave. Shpikja e temës së demarkimit, humbja e 10 mijë hektarëve, protesta. 2016-a do të ishte viti kur do të kishim liberalizim vizash. Jemi më 2019 dhe ende jemi me temën e njëjtë. Qytetarët e dinë që më 2012 morëm udhërrëfyesin për liberalizim. Kemi pas dyfish kritere. Ne, kryesisht si PDK, kemi bërë punë të mëdha në përmbushjen e kritereve. Edhe të tjerët gjithashtu. Edhe Haradinaj e votoi vijën e njëjtë. Më 2016 kemi humbur shans të madh. Arritjet e vonuara s’janë arritje. Nëse ndodh më 2020 s’është arritje. E njëjta është për dialogun. Nëse nuk përmbyllet në një afat të caktuar kohor, por shtyhet për vite të tëra e pas 20 vjetësh pavarësi mbesim edhe më tutje jashtë sistemit ndërkombëtar, do ta kemi edhe më të vështirë”, ka thënë tutje Hoxhaj.
Ai ka shtuar po ashtu se PDK-ja s’do të bëjë më “koalicion pesë minuta para mbylljes së afatit”.
Ka thënë se “i vetmi koalicion do të jetë ai me qytetarët”.
Sipas tij, çdo koalicion parazgjedhor i përbërë nga të tjerët është “për shkak se kanë frikë nga PDK-ja”.
