Përfaqësuesja e Kosovës në futboll (femrat) e ka humbur me rezultat të lartë, 5:0, ndeshjen ndaj Rusisë që i takoi eliminatoreve për “Euro 2021”. Kjo ndeshje u luajt të premten mbrëma në Wiesbaden të Gjermanisë.
Kosova pranoi gol që në minutën e parë, ndërsa dominimi i ruseve solli edhe golin e dytë të tyre në minutën e 33-të. Rusia pati fillim të furishëm në pjesën e dytë duke shënuar tre gola të shpejtë dhe duke përmbyllur sfidën.
Kosova të premten nuk e pati cilësinë dhe përvojën e duhur për t’iu kundërvënë ruseve me përvojë nga ngjarjet e mëdha. Kosova për herë të parë po luan në eliminatore për Evropian, ndërsa në lojën e saj ka pasur shumë probleme. Kosova ka provuar disa herë në sulm, por pa bërë shumë.
Kjo megjithatë nuk është humbja më e thellë e Kosovës. Humbjen më të thellë deri më tani Kosovës ia ka shkaktuar Greqia në eliminatoret për Botërorin e vitit të kaluar. 6:0 ishte rezultati në të mirë të Greqisë. Me rezultat të njëjtë është humbur edhe një miqësore nga Franca.
Ciklin aktual eliminator Kosova e ka nisur me fitore 2:0 ndaj Turqisë. Më pas pësoi 5:0 nga Sllovenia kurse në ndeshjen e tretë fitoi 2:1 në udhëtim ndaj Estonisë.
Rusia me fitore ka dalë e dyta në grup me 9 pikë. Prinë Holanda me 18 pikë nga gjashtë ndeshje. Kosova është e katërta me gjashtë pikë, sa i ka edhe Sllovenia. Kosova e pret Slloveninë më 10 mars në Prishtinë.
Gjasat që Kosova të përballet me sukses me Holandën, Rusinë dhe Slloveninë janë fare të vogla. Lojtaret e Kosovës nuk luajnë në nivele të larta evropiane dhe me këto përfaqësuese vjen në shprehje cilësia individuale. Por Kosova do të kërkojë suksese tjera me Estoninë e Turqinë.
Ndeshja me Rusinë është luajtur në terren neutral me vendim të UEFA-s, për shkaqe sigurie. Është kjo ndeshja e parafundit në mes të ekipeve të dy vendeve. UEFA ka vendosur që në të ardhmen mos të ketë ndeshje të Kosovës me Rusinë. E fundit do të jetë ajo e futbollisteve që do të luhet më 9 qershor, po ashtu në terren neutral.
