Nga sot, hyn në fuqi ligji, që lejon eutanazinë, duke bërë Spanjën një ndër vendet e pakta, që lejon të sëmurët që vuajnë nga sëmundje të pashërueshme, t’i japin fund jetës.
Legjislacioni i përgjigjet kërkesës së shoqërisë dhe përfshin garanci, tha ministria e shëndetësisë, nëpërmjet një deklarate.
Spanja bëhet vendi i katërt evropian, që dekriminalizon eutanazinë, pas Holandës, Belgjikës dhe Luksemburgut.
Projekt-ligji ishte prioritet i qeverisë së kryeministrit spanjoll Pedro Sanchez dhe u miratua nga parlamenti në mars.
Në bazë të ligjit eutanazia lejohet, kur një terapist shkakton vdekjen e një pacienti, si dhe vetëvrasjen e asistuar mjekësore, kur pacienti merr vetë një ilaç, të rekomanduar nga mjeku me recetë për të vdekur.
Sidoqoftë, ligji përmban kushte të rrepta: personi, qoftë shtetas spanjoll ose banor i Spanjës, duhet të jetë “plotësisht i vetëdijshëm” kur merr vendimin për të vdekur, ndërsa kërkesa e tij duhet të bëhet me shkrim “pa presion të jashtëm” dhe të ribëhet (të përsëritet kërkesa) 15 ditë më vonë.
Mjeku mund të refuzojë kërkesën nëse vlerëson se kriteret nuk janë përmbushur ose pacienti nuk është plotësisht i vetëdijshëm. Për më tepër, kërkesa duhet të miratohet nga një mjek i dytë dhe t’i jepet drita jeshile nga një komision.
