Elseid Hysaj ka dhënë kontribut në fitoren e Napolit në elitën e futbollit italian. Ai asistoi në golin e tretë të napolitanëve.
Napoli të enjten në mbrëmje e fitoi ndeshjen derbi kundër Lazios në kuadër të xhiros së 32-të në Serie A, me rezultatin 5:2.
Lorenzo Insigne nga penalltia dhe Mateo Politano pas asistimit të Dries Mertensit, shënuan në pjesën e parë për skuadrën e Napolit në minutën e shtatë dhe të 12-të respektivisht.
Hysaj asistoi për 3:0 në golin të cilin e realizoi Insigne në minutën e 53-të. Ishte asistimi i dytë i sezonit për mbrojtësin e krahut të djathtë të Shqipërisë.
Për 4:0 u përkujdes Mertens në minutën e 65-të.
Ciro Immobile në minutën e 70-të pas asistimit të Andreas Pereiras ngushtoi epërsinë në 4:1. Milinkoviq-Saviq shënoi në minutën e 74-rt për 4:2.
Megjithatë, Napoli nuk u ndal dhe realizoi edhe për golin e pestë nëpërmjet sulmuesit nigerian Victor Osimhen.
Hysaj luajti në tërë ndeshjen për skuadrën e Napolit, derisa kapiteni i Kosovës, Amir Rrahmani, u inkuadrua në minutën e 70-të.
Te Lazio, nga minuta e 83-të luajti reprezentuesi tjetër i Kosovës, Vedat Muriqi. Ndërkohë, portieri i Shqipërisë, Thomas Strakosha, ishte në bankën rezervë.
Napoli pas 32 ndeshjeve ka arkëtuar 63 pikë dhe është në vendin e pestë, ndërsa Lazio në vendin e gjashtë, me një ndeshje më pak të zhvilluar, ka 58 pikë.
