Në 31-vjeçar është arrestuar nga policia e Lezhës pasi i kishte dhënë hashash një të mituri, duke e filmuar.
Më pas 31-vjeçari e ka publikuar videon në rrjetin social Tik-Tok. Pasi kanë konstatuar videon në rrjetet sociale, policia e Lezhës është vendosur në lëvizje duke vendosur në pranga Gëzim Avdinë (Kalia).
“Strukturat hetimore të DVP Lezhë, menjëherë pas publikimit të një videoje, në rrjetin social Tik Tok, në të cilën shfaqej një shtetas duke i dhënë për të pirë një të mituri, cigare me lëndë të dyshuar narkotike, kanë nisur verifikimet për identifikimin e shtetasit që shfaqej në video.
Nga veprimet e shpejta hetimore u bë identifikimi i shtetasit G. A.( K.), 31 vjeç, banues në Patok, Kurbin.
Në vijim të veprimeve procedurale, specialisët për Hetimin e Narkotikëve të Drejtorisë Vendore të Policisë Lezhë arrestuan në flagrancë 31-vjeçarin, për veprën penale “Nxitja për përdorimin e drogës”, thuhet në njoftimin e policisë.
Lidhur me rastin ka reaguar edhe ministri i Brendshëm, Taulant Balla. Në një reagim për mediat ai shkruan se i ka kërkuar Drejtorit të Përgjithshëm të Policisë së Shtetit identifikimin e këtij personi dhe më pas Policia ka bërë të mundur ndalimin.
“jam njohur sot pasdite me një video skandaloze ku një person i papërgjegjshëm duket se i ofron një cigare (të dyshuar hashash) një të mituri.
Menjëherë i kam kërkuar Drejtorit të Përgjithshëm të Policisë së Shtetit identifikimin e këtij personi dhe më pas Policia ka bërë të mundur ndalimin e tij të menjëhershëm dhe shoqërimin në Komisariatin e Kurbinit, i akuzuar për nxitje të përdorimit të lëndëve narkotike në rrethana rënduese”, thekson Balla.
