Shkencëtarët kanë zbuluar një dinozaur të çuditshëm me armaturë dhe gjemba të gjatë thuajse 1 metër në qafë.
Spicomellus afer jetoi rreth 165 milionë vite më parë dhe është shembulli më i lashtë i dinozaurëve me armaturë që quhen ankilozaurë. Për ekspertët, pamja e kafshës së gjetur në Marok është tronditëse sepse tani duhet të hulumtojnë sërish për mënyrën sesi këto kafshë kanë evoluar.
“Është një nga dinozaurët më të çuditshëm të zbuluar ndonjëherë”, tha profesori Richard Butler për BBC.
“Nuk e shohim te shumë kafshë, të gjalla apo të zhdukura. Është i mbuluar me gjemba të çuditshëm që dalin edhe nga shpina, qafë me kocka dhe një lloj arme në fund të bishtit, kështu që është dinozaur i pazakontë”, shtoi kolegia e tij Susannah Maidment.
Sipas Butler, ankilozaurët jetuan në periudhën e vonë të Kretakut, rreth 145-66 milionë vite më parë. Në fund të kësaj epoke, dolën grabitqarë të mëdhenj si Tiranosaur reksi, ndaj mendohej se ankilozaurët në fillim kisha pllaka të vogla dhe të thjeshta në shpinë që më vonë u bënë më të mëdha dhe të forta për t’u vetëmbrojtur nga këta grabitqarë.
“Në vend të kësaj, ne kemi një kafshë me gjemba si iriqë, mburojën më të çuditshme që kemi gjetur te një kafshë dhe shumë ndryshe nga ato që kemi parë te ankilozaurët e vonë.”
Shkencëtarët s’kanë mjaftueshëm pjesë nga skeleti që të sigurohen për përmasat e kafshës, por mendojnë se duhet të ketë qenë rreth 4 metra e gjatë dhe 1 metër e lartë, me peshë 2 ton.
Ky zbulim hap mundësinë që ankilozaurët mund të kenë pasur një mburojë të fortë në periudhën e hershme të Xhurasikut dhe evolucioni i bëri më të thjeshta dhe funksionale.
Fosili u gjet nga një fermer vendas në Boulemane të Marokut. Ky është ankilozauri i parë që zbulohet në kontinentin afrikan.
