33-vjeçari shqiptar i arrestuar dhe i akuzuar si bashkëpunëtor i të armatosurit që plagosi rëndë tre shtetasit grek mëngjesin e së shtunës në Gazi është i njohur për autoritetet në shtetin helen.
Sipas mediave greke Emiliano Jakupi dyshohet se ishte pasagjer në xhipin që drejtohej nga shqiptari tjetër, i cili është shpallur në kërkim.
Në 2008, 33-vjeçari shqiptar u arrestua nga rojet kufitare të Kristallopigisë për kontrabandë emigrantësh.
Në 2010 ai u akuzua nga Gjykata e Shkallës së Parë Thesproti për trafik droge.
Në 2012 në një çështje të trajtuar nga Drejtoria e Policisë Chalandrio, ai akuzohej për pjesëmarrje në organizatë kriminale, vjedhje, armëmbajtje dhe droga.
Në 2015 kundër tij është ngritur një dosje për vrasje në tentativë, lëndim të rëndë dhe shkelje të ligjit për armët.
Në 2019 në një çështje të trajtuar nga Drejtoria e Sigurimit Patras, ai akuzohej për pjesëmarrje në organizatë kriminale, falsifikim dhe vjedhje. Gjykata e Shkallës së Parë të Patrës më pas kishte vendosur kushtin kufizues të frekuentimit një herë në muaj në komisariatin e Melisisë.
