Tridhjetekatërvjeçari Kristian Kola u ekzekutua nga dy persona, të cilët ishin veshur me të zeza, kishin vënë skafandrat dhe sapo konstatuan se ai po shkonte i vetëm drejt automjetit të tij, e qëlluan disa herë me armë zjarri silenciator.
Kjo është dinamika e ngjarjes së rëndë e regjistruar mbrëmjen e shkuar në Shkodër, ku mbeti i vrarë i riu, i cili nuk njihej si person me precedentë kriminalë, pavarësisht se para dy vitesh ishte dyshuar si autori i një plagosjeje.
Të dhënat e grupit hetimor i thanë Radio Televizionit Shqiptar se viktima punonte në ndërtim bashkë me babain e tij dhe se asnjëherë nuk kishte shfaqur sjellje problematike apo të dyshimta.
Po sipas këtyre të dhënave, autorët e kanë planifikuar mirë ekzekutimin, pasi e kanë vëzhguar të riun, i cili ishte në shoqërinë e dy personave të tjerë, por sapo u largua prej tyre e qëlluan për vdekje.
Policia e Shkodrës ende nuk ka folur për numrin e plumbave që u derdhën në drejtim të tij, por thotë se ekzekutimi u krye në një distancë shumë të afërt, me armë zjarri silenciator.
Për nga mënyra sesi autorët e kanë kryer atentatin po punohet në pistën e një vrasjeje me pagesë, pasi në momentin kur kanë qëlluar nuk është dëmtuar asnjë person apo send që ndodhej në afërsi të viktimës.
Autorët ende mbeten në arrati dhe grupi hetimor nuk ka mundur që t’i identifikojë.
Kamerat e sigurisë në zonë pritet të ndihmojnë grupin hetimor për të përftuar imazhe të të gjithë personave që e kanë frekuentuar zonën në momentin e ngjarjes, para apo pas saj.
Blutë e Shkodrës po marrin edhe dëshminë e personave që mund të kenë qenë brenda në lokal në momentin e atentatit, si dhe ata që ishin jashtë tij, aty ku po pinte kafe edhe viktima.
