Ka ndërruar jetë në moshën 83-vjeçare ish kryetari i Bashkisë së Korçës, Robert Kotmilo.
Kotmilo edhe duke qenë kryetar i bashkisë më të madhe në juglindje të vendit ka ndërruar jetë i vetëm në banesën e tij, në kushte shumë të vështira ekonomike, madje mësohet se për të janë kujdesur organizata humanitare dhe në mënyrë të veçantë Mitropolia e Korçës.
Ai jetonte në një banesë gati të rrënuar dhe në kushte tepër të vështira ekonomike.
Kotmilo ka shërbyer si kryebashkiak i qytetit të Korçës nga viti 1996 deri në vitin 2000.
Edhe pse pati ftesë nga strukturat e Partisë Demokratike për të kandiduar për një mandat të dytë, ai vendosi të tërhiqej.
“Unë i përkas tjetër brezi. Që kur isha drejtor i frigoriferit e merja bukën me vete. Në një rast mu rëzua buka rrugës.
Kur njerzit panë domatet po qeshnin. Në një rast tjetër po interesohesha për tuba për shtëpinë.
Një grua që më dëgjoi në dyqan qesëndisi: po ti ore, as kanalizimet e shtëpisë nuk bën dot? Të tjerët ngrenë vila.
I tillë kam qënë dhe mbeta. Do thonë ishte i pazoti po aq më bën. Jam i lumtur me moralin e qytetarit të thjeshtë dhe të qetë”, shprehej ai në një intervistë të disa viteve më parë.
