Dy nga biznesmenët e ftuar nga Kryeministri në Iftarin e djeshëm, deri pasdite vone ishin në nje drekë. Rastisi që në atë drekë të isha dhe unë. Aty u pi verë deri në orën 5 të pasdites. Papritmas dy biznesmenët u çuan.
Do ikim të bëjmë abdes- thanë- se na ka ftuar kryeministri për Iftar. Nga vera franceze direkt në Iftar.
Doktrina Islame e lejon ftuarjen në Iftar të atyre që nuk janë myslimanë, apo që nuk e praktikojnë Islamin. Mjafton që Iftari të shërbejë sadopak, që ata të krijojnë një vlerësim pozitiv për Islamin. Pra të zbusin zemrën kundrejt fesë islame. Por cili është qëllimi real i Iftarit?
Kryeministri ka të drejtë kur thotë se Islami është, një dhuratë e paçmueshme për njerëzimin. Madje parimet e islamit janë shumë më tepër se aq. Përfshirë ato që lidhen me iftarin.
Ajetet kuranore por edhe thëniet e Profetit Muhamed, paqja qoftë mbi të, orientojnë se qëllimi kryesor i Iftarit është ofrimi i ushqimit për njerëzit në nevoje. Pra për ata që nuk kanë mundësi ekonomike, ta sigurojne atë.
Ibn-i Hıbban shkruan në tregimet e tij se Profeti ka thënë:
“Kushdo që ofron iftar nga të ardhurat e tij të ligjshme për ata që agjërojnë në muajin e shenjtë të Ramazanit, në të gjitha netët e Ramazanit engjëjt luten për të. Mjafton sikur edhe një pikë ujë nëse ofruesi nuk ka mundësi për më shumë”.
Pra Iftari shtrohet kryesisht për agjëruesit, ata që janë në nevoje dhe ata që mund të zbusin zemrën e tyre kundrejt Islamit.
Për kë e shtroi kryeministri Iftarin dje?
A ishin ata aty njerëz në nevojë?
Jo. Aty ishin biznesmenët më të pasur të Shqipërisë dhe gazetarët, shumica e të cilëve i shërbejnë oborrit të sulltanatit.
A ishin ata besimtarë që agjëronin?
Jo. Të paktën 2 prej tyre ishin duke pirë verë me mua deri një orë para Iftarit të kryeministrit.
A ishin ata luftëtarë të Allahut, siç thonë ajetet kuranore?
Jo. E vetmja luftë që bëjnë shumica e atyre është, se kush të marrë më shumë tendera publike.
Ky ishte Iftari i kryeministrit. Në mos një takim, ku për disa prej të pranishmeve ka qenë mundësi e mirë pazaresh për ndonjë tender. Ky është gjynah dhe korruptim i fesë.
Në fund ka dhe diçka tjetër, po kaq të rëndësishme. Veç myslimanëve, në Shqipëri jetojnë edhe katolikë dhe ortodokse. Pse kryeministri nuk shtron drekë edhe për Pashkët?!
