Këngëtarja shqiptare me famë ndërkombëtare, Bebe Rexha, së fundmi kritikoi faktin se në TikTok ishte shfaqur si sugjerim një kërkim i shpeshtë i bërë nga fansat lidhur me peshën e saj.
Në një kritikë të adresuar në Twitter, 33-vjeçarja ka shkruar se nuk shqetësohet nga kjo, pasi është e vetëdijshme që ka shtuar shumë në peshë, ndërsa ka falënderuar ata që e duan pavarësisht dukjes së saj.
Mirëpo një fans tjetër ia ka bërë të qartë këngëtares së hitit “I’m a mess” se disa persona të paautorizuar po përdorin imazhin e saj edhe për reklama në faqet e filmave për të rritur.
Në fotografi mund të shihet një fotografi e Bebe Rexhës origjinale dhe një tjetër e bërë me ‘photoshop’ ku reklamohet një program dobësimi.
“Ata po të përdorin ty në reklama gjithashtu”, kishte shkruar përdoruesi i Twitterit, i cili gjithashtu kishte shfaqur një fotografi ku tregonte se reklama në fjalë i kishte dalë në një video pornografike të homoseksualëve.
“Kjo thjesht më bëri lëmsh”, shkroi Bebe Rexha me të parë këtë postim nga fansi, të cilin më pas e ndau me miliona ndjekës të saj në Twitter.
Rexha përndryshe po përgatitet që më 28 prill të publikojë albumin e saj më të ri, njëherësh të tretin në karrierën e saj të titulluar “Bebe”.
