Inceneratori i Elbasanit mbahet në gjendje pune nga administratorët shtetërorë, por nuk kryen incenerim mbetjesh për momentin. Kësht tha administratori shtetëror që ka marrë në dorëzim kompaninë, pas sekuestrimit të saj nga SPAK.
“Brenda fundit të javës inceneratori i Elbasanit do të vihet në punë dhe do të prodhojë energji. Për ta vënë inceneratorin në punë, duke mos pasur sasi të mjaftueshme për të siguruar lëndën e parë, menduan që ishte më e dobishme të mbahesh i ndezur, por jo funksional”, tha Faraudin Arapi, gjatë marrjes në pyetje në Komisionin Hetimor për inceneratorët.
“Mbajtja në punë ka një posto x lekë, por janë mbajtur në punë aparaturat, sepse po të fiken duan ditë të tëra që të ndizen”.
Sipas administratorëve, në ditë, atje përpunohen 110-120 tonë. Por të gjitha mbetjet futen në landfill dhe nuk incenerohen.
Edhe seanca e të martës në komision u shoqërua me debate mes anëtarëve demokratë dhe socialistë, për mënyrën sesi ka funksionuar ky impiant përpunimi dhe si është nënshkruar dhe zbatuar kontrata koncesionare.
Sipas Arapit, po të mos dilte vendimi i SPAK, impianti ishte i gatshëm t’i dorëzohej Bashkisë Elbasan.
Inceneratori i Elbasanit është subjekt hetimi nga SPAK, pasi për procedurat e koncesionit të tij është arrestuar ish-ministri i Mjedisit, Lefter Koka, dhe janë shpallur në kërkim administratorët e kompanisë fituese të koncesionit, Klodian Zoto dhe Stela Gugallja. SPAK thotë që ka nisur hetime edhe për inceneratorët e Tiranës dhe Fierit.
