Rreth 7.3% janë rritur çmimet e produkteve në Kosovë vetëm gjatë muajit Shkurt.
Ilir Berisha: Lëvizjet e çmimeve kanë pasur një ngritje dhe Agjencia e Statistikave përcjellë listën e çmimeve në baza mujore. Së fundmi agjencia ka publikuar indeksin për Shkurt ku është vërejtur rritje e çmimeve që nuk ka qenë shumë e lartë diku 7.3 për qind. Një pjesë e madhe e artikujve janë të varura 100 për qind nga importi. Do të kemi lëvizje edhe të çmimit të transportit.
Por këto çmime janë rritur edhe më shumë gjatë Marsit, disa ditë pas nisjes së luftës në Ukrainë ku edhe u rritën dukshëm çmimet e naftës.
Fadil Berjani, kryetar i Shoqatës së Naftëtarëve, tha se momentalisht Kosova ka çmimet më të lira në rajon sa i përket derivateve, duke kërkuar nga ata që i kanë rritur çmimet e produkteve në emër të derivateve, t’i ulin ato.
Fadil Berjani: Ata të cilët kanë rritur çmimet në emër të derivateve i lus që të ulin çmimet sepse ka rënë. Unë po e them se derivatet e naftës në Kosovë janë më të lirat në regjion. Shqipëri, 1.77, Serbi-1.60, Mal të Zi 1.74, në Kosovë janë 1.49 deri në 1.52 cent. Këto janë çmimet aktuale në Kosovë.
Për rritjen e çmimeve është debatuar edhe në Kuvendin e Kosovës, ku opozita ka hedhur kritika të shumta ndaj qeverisë për sipas tyre mosmenaxhimin e duhur të situatës. Nga qeveria kanë bërë të ditur se se ulja e akcizës dhe TVSH-së për disa produkte do të ishte vendim i gabuar, kërkesë kjo e opozitës.
