Kreu i Partisë Demokratike Lulzim Basha po zhvillon takime në Parlamentin Europian në kuadër të diskutimeve për integrimin dhe të ardhmen e rajonit të Ballkanit Perëndimor.
Basha shprehet se një vend të veçantë në takime zuri edhe Kosova, ndërsa thekson se kërkon një hetim të shpejtë të ngjarjeve të 24 shtatorit në Banjskë.
“Sot është më e rëndësishme se asnjëherë, që vendet anëtare të BE dhe NATO, të cilat ende se kanë njohur Kosovën ta ndërmarrin një hap të tillë si interes për paqen dhe rajonin në Europë”, shkruan Basha në Facebook.
Postimi i plotë i Bashës:
Ditë intensive në Parlamentin Europian diskutime për situatën në Shqipëri dhe Rajon.
Në biseda me eurodeputetë dhe drejtues të Parlamentit Europian diskutuam për domosdoshmërinë e procesit të integrimit të vendeve të rajonit në BE. Një vend të veçantë në takime zuri Kosova dhe procesi i dialogut me Serbinë. Vlerësova përkushtimin e PE dhe qasjen e tij ndaj Kosovës dhe zhvillimeve të fundit. Është shumë i rëndësishëm një hetim i shpejtë e i plotë i ngjarjeve në Bajnskë për të nxjerrë para drejtësisë organizatorët dhe urdhëruesit e sulmit ndaj policisë.
Sot është më e rëndësishme se asnjëherë, që vendet anëtare të BE dhe NATO, të cilat ende se kanë njohur Kosovën ta ndërmarrin një hap të tillë si interes për paqen dhe rajonin në Europë. Në diskutime dhe debate të veçanta në Parlamentin Europian u diskutua për sigurinë dhe të ardhmen e Rajonit dhe Europës përballë kërcënimeve të sigurisë.
