Inter bën hapin tjetër fals. Zikaltërtit barazuan në udhëtim ndaj Torinos. Sanchez i shpëtoi me një pikë në fund. Vojvoda u paraqit 90 minuta në fushë, ku kishte detyra defansive. Etrit Berisha u veçua me paraqitje të mirë.
I vetëdijshëm që ekipi i tij kishte lëshuar terren me pikë të humbura më shumë sesa që duhej gjatë këtyre ditëve, Simone Inzaghi pak para fillimit të ndeshjes deklaronte që “nga tani e tutje të gjitha ndeshjet janë të rëndësishme – duhet të gabojmë sa më pak”.
Kështu nuk ndodhi, pasi mu sonte Inter gaboi, duke barazuar në Piemonte në sfidën ndaj Torinos së Juric. Klubi zikaltër vinte pak ditë pas eliminimit nga Liga e Kampionëve, ku u paraqitën në mënyrë dinjitoze, sado që nuk ia dolën të avancojnë tutje.
Nëse ndaj Liverpool në të dy ndeshjet Inter e vuajti shumë mungesën e Barella, sot u ndje tej mase ajo e Brozovic në mesfushë, që për këtë skuadër është garanci në vete. Mandragora nuk e pati aspak problem që ta dominojë urugujasin Vecino. Për të mos munguar kjo, edhe shkalla e efikasitetit nga zikaltërtit në periudhën e fundit nuk po dëshmohet si më e mira, me raste shënimi të shumta që po shpërdorohen.
Ndeshja filloi me Inter që provoi t’i ndërtonte disa sulme, por pa rrezikuar shumë. Zhvillohej minuta e 11-të, kur në një aksion ku topi përfundoi në zonë në formë rrokambolleske, ishte Bremer që pati nuhatjen dhe fatin më të mirë, duke e pranuar atë dhe goditur – për t’i dërguar në epërsi “granata”.
Torino pastaj u tërhoq edhe më shumë në gjysmë fushën e saj. Në minutën e 30-të Calhanoglu ekzekutoi një goditje dënimi nga pozita anësore, atë në fund e devijoi Ranocchia paksa, por pritjen fantastike u përkujdes ta bëjë Etrit Berisha.
Pastaj Torino u përpoq të rrezikojë me Mandragora një minutë para përfundimit të pjesës së parë, por pa sukses, pasi goditja e tij nga 20 metra, nga pozita ballore, shkoi jashtë shtyllës së djathtë.
Pjesa e parë përfundoi 1 me 0!
Në pjesën e dytë ishte Inter që për 20 minutat e para ishte shumë kërkuese, me aksione që filluan të shpeshtoheshin, por pa gjetur konkretizim. Disa goditje që përfunduan jashtë portës si ato të Vecino dhe Dzeko, nuk sollën ndonjë rezultat.
Etrit Berisha u konfirmua se ishte në disponim të lartë për lojë kur neutralizoi goditjen e Dimarco nga afro 6 metra distancë, duke e devijuar atë në këndore.
Në minutat në vazhdim Brekalo rrezikoi edhe një herë, kur dribloi një seri lojtarësh, duke përfshirë edhe Handanovic, por në fund goditja e tij u devijua në këndore.
Pak minuta më vonë Izzo goditi me kokë furishëm, pasi u gjend i vetmuar në zonën e 11 metërshit falë një këndoreje që u ekzekutua, por Handanovic kërceu për ta devijuar topin dhe shmangur golin e dytë.
Pasqyra e ndeshjes në 25 minutat e fundit u karakterizua me lojë dinamike. Sulmuesi boshnjak, Edin Dzeko, një minutë para përfundimit të 90 minutëshit të rregullt të lojës ku goditi me kokë dobët, me topin që shkoi lart, ani se ishte në pozitë të mirë shënimi – si dhe atë të Pobegas, kur goditi me kokë jashtë shtyllës së parë, gjegjësisht në minutën e 92-të.
Kronometri shënonte minutën e 93-të kur të gjithë menduan se mbaroi ndeshja, ishte Alexis Sanchez ai që mendoi ta dëshmojë të kundërtën, duke mposhtur Etrit Berishën, pas një pasimi shumë të bukur që pranoi nga Edin Dzeko brenda zonës së 16 metërshit kundërshtar. Pa pritur e menduar shumë, kiljani goditi në mënyrë klinike për ta barazuar rezultatin në 1 me 1.
Me këtë barazim Inter renditet në pozitën e tretë në Serie A, me një ndeshje më pak të zhvilluar dhe 4 pikë distancë nga Milan që udhëheq kampionatin dhe 1 sosh nga Napoli që e ndjekë atë në vend të dytë.
