Gazetari i njohur gjerman, Michael Martens, në një shkrim së fundmi në Frankfurter Allgemeine Zeitung, analizoi një propozim të dhëndrit të Donald Trump për të investuar në Serbi dhe Shqipëri.
Në një intervistë për Adi Krastën në ‘A Show’ në SYRI TV, gazetari tha se Rama dhe Vuçiç po bëjnë marrëveshje për të krijuar siguri politike. Ai tha se nëse Donald Trump zgjidhet president në zgjedhjet në SHBA, kjo është një avantazh politik për Vuçiç dhe Ramën që t’i lejojnë të ketë marrëveshje tregtare me dhëndrin e tij.”E di rastin e Serbisë, më mirë se atë të Shqipërisë, por duhet të ketë ngjashmëri. Në përgjithësi kjo ka qenë forma e të bërit biznes. Por është edhe një lloj investimi politik që ka bërë Vuçiç në Serbi dhe atë që po përpiqet të bëjë Rama në Shqipëri. Nëse Trump do bëhet president i radhës, patjetër që është një avantazh politik për Vuçiçin dhe Ramën që t’i lejojnë të ketë marrëveshje tregtare me dhëndrin e tij. kjo gjë ka ndodhur prej dekadash në Ballkan, ndoshta edhe prej shekujsh.
Gjithmonë ka ekzistuar lidhja mes liderëve me figurat më të fuqishme të perëndimit, sepse kur e ke mirë me ta, apo kur e ke mirë me Perandorinë Osmane, atëherë mund të bësh ç’të duash në pashallëkun tënd.
Është një investim disi i rrezikshëm dhe mendoj se njerëzit po e ndjekin nga afër koston politike të këtij investimi.Opozita në Serbi dhe në Shqipëri duhet t’i monitorojë nga afër këto lëvizje. Kudo në botë, madje edhe në Ballkan, projektet e mëdha infrastrukturore, synojnë të shkaktojnë korrupsion. Dhe në Shqipëri ka patjetër korrupsion. Është e rëndësishme që në këtë kohë, shoqëria ta dijë mirë se çfarë planifikohet sepse nuk është thjesht një biznesmen, por është dhëndri i njeriut më të fuqishëm të botës që do investojë. Vuçiçi dhe Rama duket se po bëjnë një marrëveshje që të kenë një siguri politike,” tha Martens.
