Ministri i Punëve të Jashtme i Iranit, Mohammad Javad Zarif, ka thënë se vendi i tij do t’i kthehej zbatimit të plotë të marrëveshjes bërthamore të vitit 2015 me fuqitë e mëdha, nëse i zgjedhuri president i Shteteve të Bashkuara, Joe Biden, ia heq sanksionet Iranit.
Gjatë një interviste për një gazetë iraniane, kryediplomati i republikës islamike tha se Teherani vazhdon të mbetet i përkushtuar ndaj paktit bërthamor dhe se Bideni do të mund t’i bënte ndryshimet shpejt përmes tre urdhrave ekzekutivë.
Muajve të fundit, Irani gradualisht i ka pakësuar zotimet që dalin nga kjo marrëveshje si reagim ndaj sanksioneve amerikane, të cilat presidenti Donald Trump ia vendosi këtij shteti pasi e largoi vendin e tij më 2018 nga marrëveshja bërthamore.
Irani është ankuar se nuk është duke përfituar ekonomikisht nga marrëveshja bërthamore, sipas së cilës shteti i Lindjes së Mesme në masë të konsiderueshme e ka kufizuar programin bërthamor në këmbim të largimit të sanksioneve nga Perëndimi, shkruan Free Europe, transmeton Gazeta Express.
Në anën tjetër, presidenti i zgjedhur amerikan, Joe Biden, ka thënë se do të bashkëpunojë me vendet nënshkruese të paktit bërthamor për ta ndryshuar dhe plotësuar marrëveshjen posa Irani t’i kthehet zbatimit të saj. Megjithatë, analistët kanë thënë se ka pak gjasë që Shtetet e Bashkuara të kthehen menjëherë në këtë marrëveshje.
