Agjencia Ndërkombëtare e Energjisë Bërthamore tha se Irani e ka filluar procesin e metalit të uraniumit të pasuruar, që mund ta ndihmojë këtë shtet për të prodhuar armë bërthamore.
Teherani e informoi vetë organin ndërkombëtar për masën e re, për të cilën tha se ka për qëllim që të zhvillojë karburant për një reaktor hulumtues, shkruan BBC.
Zyrtarët nga Gjermania, Franca e Britania thanë se ky veprim i Republikës Islamike mund t’i rrezikojë bisedimet për ringjalljen e marrëveshjes bërthamore të vitit 2015, ndërsa Shtetet e Bashkuara thanë se ky është një hap fatkeq prapa.
Sipas marrëveshjes së vitit 2015, Irani do të kishte kufizime në programin e vet bërthamor në këmbim të largimit të sanksioneve ekonomike nga Perëndimi.
Ish-presidenti i ShBA-së, Donald Trump, i largoi Shtetet e Bashkuara nga kjo marrëveshje në vitin 2018 dhe i ktheu në fuqi sanksionet kundër Iranit. Irani u kundërpërgjigj me shkelje të pikave të marrëveshjes dhe me pasurim të uraniumit.
Deri më tani, edhe administrata e presidentit Biden i ka mbajtur në fuqi sanksionet kundër Iranit, por një delegacion amerikan e përfaqësues të fuqive tjera botërore po zhvillojnë bisedime me Iranin në Vjenë në përpjekje për t’u kthyer në marrëveshje.
Presidenti i porsazgjedhur i Iranit, Ebrahim Raisi, dëshiron që Shtetet e Bashkuara ta bëjnë hapin e parë duke i larguar sanksionet, ndërsa ShBA-ja thotë se Irani fillimisht duhet t’i kthehet zbatimit të marrëveshjes në mënyrë që t’i hiqen masat ndëshkuese më pas.
