Në konferencën për shtyp, këtë të mërkurë, Sali Berisha u pyet nga gazetarët nëse do të ishte i gatshëm të jepte dorëheqjen dhe nëse do të ishte zgjidhja më e mirë për opozitën.
Ish-kryeministri u shpreh se ai ka premtuar vetëm votën e lirë gjatë kësaj kohe fushate. “Ata të cilët nuk kanë respekt për votën, nuk i referohen votës, dëshmojnë një mentalitet totalitar mjeran. Gjithçka, Sali Berisha, në këtë kohë të shkurtër, nuk u ka premtuar shqiptarëve, përveç votës së lirë. Nëse bëni analizën se 70% e opozitës shqiptare u rreshtua në krahun e tij, shpjegon se ata duan votën e lirë. Çdo analist që do të diskutojë për problemin, nëse del jashtë boshtit të votës së lirë ka një arsyetim të rrezikshëm, që nuk ka asnjë gjë të përbashkët me votën e lirë”.
Por më tej, Sali Berisha theksoi se e vërteta që vërtetoi 6 marsi ishte rikthimi i Sali Berishës. Ai theksoi se do të kandidojë për kryetarë të PD. “Do të garoj për kryetar të PD-së, por garantojë për çdo kandidat tjetër kushte të barabarta dhe garantoj demokratët që do të pranoja rezultatin pa asnjë koment. Rikthimi ka ndodhur më 6 mars. Ai nuk zhbëhet më, veçse me votën e qytetarëve shqiptarë”, tha Berisha.
Berisha zbuloi se të enjten do të mblidhet Komisioni i Rithemelimit. “Nesër do të mblidhet Komisioni i Rithemelimit për të marrë vendime lidhur me datën 22 mars. Nuk mund të shprehem paraprakisht se cili do të jetë vendimi, por iu them se gjatë këtyre 5 javëve, të gjitha forcat e organit drejtues të PD, por jo vetëm qendrorit, por edhe rretheve, kanë qenë të përqendruara na këtë fushatë elektorale në kushte të pabarabarta. Do të bëhet një bilanc në cilin stad është ecuria edhe në degët e tjera ku nuk kishte zgjedhje”, tha Berisha.
