Ish-kryeministri francez Dominique de Villepin ka lëshuar një paralajmërim të fortë ndaj vendeve evropiane lidhur me rritjen e shpenzimeve ushtarake dhe varësinë ndaj mbrojtjes amerikane. Në një intervistë të fundit, Villepin theksoi se pa mbrojtjen e sovranitetit dhe pa ndërtimin e një mbrojtjeje të pavarur, llogaritjet e vendeve të BE-së janë “cinike dhe të pasigurta”.
Deklaratat e Villepin vijnë në një moment kur ai ka zyrtarizuar synimin për të kandiduar në zgjedhjet presidenciale të vitit 2027, si dhe ka shpallur krijimin e partisë së re politike “La France humaniste”. Në të njëjtën kohë ka publikuar librin e tij të ri “Le Pouvoir de dire non”, një referencë ndaj qëndrimit të tij historik kundër luftës amerikane në Irak në vitin 2003.
Diplomacia e puthjes ka dështuar
Villepin kritikoi qasjen e disa udhëheqësve perëndimorë ndaj liderëve globalë, duke e cilësuar atë si “diplomaci të puthjes”. Sipas tij, “edhe liderët më vanitozë lodhen nga gjestet servile”, duke shtuar se “Evropa duhet të ndalë përkëdheljen e fuqive të mëdha dhe të mbrojë vlerat e saj”.
Trump kërkon fitore të lehta, por po krijon precedent të rrezikshëm
Sa i përket armëpushimit mes Iranit dhe Izraelit, ish-kryeministri francez u shpreh se presidenti amerikan Donald Trump është “tërhequr në një fushatë që Netanyahu e paraqiti si një fitore të lehtë”, duke e konsideruar ndërhyrjen si të nxituar dhe potencialisht të rrezikshme.
“Trump dhe aleatët e tij, si J.D. Vance, kanë frikë nga ajo që ndodhi në Irak. Ata duan që kjo të konsiderohet si përjashtim. Por problemi është se ky përjashtim po shndërrohet në rregull”, deklaroi Villepin.
Bombardimet në Iran, “të paligjshme”
Duke iu referuar bombardimeve amerikane në Iran, Villepin i cilësoi ato si një “luftë parandaluese, e njëanshme dhe e paligjshme”. Ai shtoi se “e drejta ndërkombëtare është garanci për të gjithë” dhe paralajmëroi se standardi i dyfishtë i Perëndimit, dënimi i agresionit rus por heshtja për Gazën është “i papranueshëm”.
“Deklaratë e papërgjegjshme” nga kancelari gjerman
Villepin komentoi edhe deklaratën e kancelarit gjerman, i cili kishte thënë se Izraeli “po bën punën e ndyrë për Perëndimin”. Ai e cilësoi këtë si një “fjalë jashtëzakonisht të rëndë” që “justifikon ndërhyrje ushtarake për arsye oportuniste”.
Ai shtoi se: “Nuk dimë ende pasojat reale të sulmeve në Iran. Ku janë 400 kilogramët e uraniumit të pasuruar? Duhet të rikthehet inspektimi ndërkombëtar dhe bashkëpunimi”.
Kundër rritjes së verbër të shpenzimeve ushtarake
Villepin kritikoi ashpër idenë që rritja e shpenzimeve ushtarake në NATO të shërbejë vetëm për blerjen e armëve amerikane.
“Shikoni Danimarkën: avionët amerikanë F-35 mund të bllokohen me një urdhër nga Uashingtoni. Nëse nuk ndërtojmë një mbrojtje evropiane sovrane dhe të pavarur, do të kemi humbur”, u shpreh ai.
“Aleanca Atlantike nuk ka më besim të brendshëm”
Për ish-Kryeministrin francez, artikulli 5 i NATO-s, që garanton mbrojtje të përbashkët, është vënë seriozisht në pikëpyetje nga Donald Trump. Villepin tha se jemi në një epokë të re, ku kërcënimet kibernetike, dezinformimi dhe populizmi e kanë zbehur ndjeshëm unitetin strategjik të vendeve evropiane.
Putin përfiton, Zelensky mbetet i vetmuar
Duke analizuar zhvillimet globale, Villepin u shpreh se Presidenti rus Vladimir Putin ka dalë më i fortë nga përfshirja amerikane në konfliktin Izrael-Iran. “Ai nuk është më i izoluar. Ndjehet i legjitimuar. Ndërsa presidenti Zelensky është shumë më i vetëm dhe lufta në Ukrainë ka kaluar në plan të dytë.“
Rreziku i ekstremit të djathtë është real – prandaj rikthehem
Në fund, Dominique de Villepin konfirmoi ambicien e tij politike, duke argumentuar se “momenti historik e kërkon këtë”. Ai e cilësoi rritjen e partisë populiste Rassemblement National si alarmante, por u shpreh se nuk mund të luftohet e djathta ekstreme duke e ndjekur nga pas.
“Zgjidhjet ekzistojnë. Nuk na mungon përmbajtja, por koherenca, uniteti dhe vizioni”, përfundoi Villepin.
