Ish-ministrja e Brendshme e Britanisë, Suella Braverman, është bërë deputetja më e fundit e Partisë Konservatore që dezerton drejt Reform UK.
Ajo është deputetja e tretë konservatore në detyrë që i bashkohet partisë së Nigel Farage brenda njëmbëdhjetë ditëve të fundit, duke e çuar numrin total të deputetëve të Reform UK në tetë.
E prezantuar në një tubim në Londër, Braverman u tha mbështetësve të Reform se kishte dhënë dorëheqjen edhe nga anëtarësia e saj 30-vjeçare në Partinë Konservatore, duke shtuar: ‘Ndjej sikur jam kthyer në shtëpi.’
Kalimi i saj vjen menjëherë pas largimit të Robert Jenrick dhe Andrew Rosindell, të cilët gjithashtu u larguan nga Konservatorët më herët këtë muaj. Si një figurë e rëndësishme e krahut të djathtë të partisë gjatë qeverisë së kaluar, Braverman prej kohësh ishte parë si një kandidate e mundshme për t’iu bashkuar Reform UK në Westminster.
Megjithatë, prezantimi i saj si rekrutja më e re e Reform erdhi si një njoftim surprizë nga Nigel Farage gjatë një aktiviteti në Londër për lançimin e një grupi partie për veteranët ushtarakë.
Deputete që nga viti 2015, Braverman ka shërbyer si Prokurore e Përgjithshme nën Boris Johnson dhe u emërua ministre e Brendshme nën Liz Truss në shtator 2022. Ajo u detyrua të japë dorëheqjen nga posti vetëm një muaj më vonë, pasi doli se kishte dërguar një dokument zyrtar te një koleg konservator përmes emailit personal.
Rishi Sunak e riemëroi atë në këtë post vetëm gjashtë ditë pasi hyri në Downing Street, por e shkarkoi vitin pasues, pas një artikulli ku Braverman akuzonte Policinë Metropolitane përanshmëri në mënyrën e policimit të protestave pro-palestineze në Londër.
Duke folur në tubimin e Reform, Braverman u tha mbështetësve se Britania ishte ‘e thyer’ dhe se emigracioni ishte ‘jashtë kontrollit’.
‘Ne ose mund të vazhdojmë në këtë rrugë të rënies së menaxhuar drejt dobësisë dhe dorëzimit. Ose mund ta rregullojmë vendin tonë, të rimarrim fuqinë tonë dhe të rizbulojmë forcën tonë,’ deklaroi ajo.
Farage tha se kishte biseduar me Braverman për ‘pak më shumë se një vit’ rreth mundësisë së kalimit të saj dhe se ajo kishte ‘ardhur në përfundimin se qendra-djathtë e politikës britanike duhet të bashkohet rreth Reform’.
Ai shtoi se bilanci i saj si ministre e Brendshme kishte qenë ‘krejtësisht i padobishëm’.
‘Të gjithë ishin krejtësisht të padobishëm sepse ishin të bllokuar nga KEDNJ-ja [Konventa Evropiane për të Drejtat e Njeriut],’ u tha ai gazetarëve.
‘Qeveria ishte një dështim, por ajo tani është e gatshme të pranojë: ‘e kishim gabim’.’
KEDNJ-ja është fajësuar nga disa politikanë për vështirësimin e deportimit të emigrantëve të paligjshëm. Qeveria laburiste aktualisht po zhvillon negociata mbi mënyrën se si interpretohet kjo konventë.
‘Kur, jo nëse’
Braverman tha se premtimi i Konservatorëve për t’u larguar plotësisht nga konventa ishte ‘një gënjeshtër’.
Partia Konservatore deklaroi se ‘ishte gjithmonë çështje kohe, jo nëse, që Suella të dezertonte’.
‘Ka disa njerëz që janë deputetë sepse kujdesen për komunitetet e tyre dhe duan të ofrojnë një vend më të mirë. Ka të tjerë që e bëjnë këtë për ambicien e tyre personale,’ shtoi një zëdhënës.
‘Suella kandidoi për lidere të Konservatorëve në vitin 2022 dhe doli e gjashta, pas Kemi-t dhe Tom Tugendhat. Në vitin 2024 ajo nuk arriti as të siguronte mbështetje të mjaftueshme për të hyrë në votim.
Tani ka vendosur të provojë fatin me Nigel Farage, i cili vitin e kaluar tha se nuk e donte atë në Reform.’
Përveç katër deputetëve konservatorë në detyrë që tashmë kanë kaluar te Reform, rreth 20 ish-deputetë konservatorë e kanë bërë këtë lëvizje që nga zgjedhjet e përgjithshme, përfshirë ish-ministrat Nadhim Zahawi, Nadine Dorries dhe Jake Berry.
Henry Smith, një nga ish-deputetët që ka kaluar te Reform, tha se Braverman ishte përpjekur ta ‘drejtonte qeverinë e kaluar në një drejtim konservator’, por ishte ‘ndalur fuqishëm’.
Duke folur për Matt Chorley në BBC Radio 5 Live, ish-deputeti i Crawley-t tha se, ndonëse lidershipi konservator ‘mund të bëjë zhurmë djathtas’, shumë deputetë konservatorë ishin ‘sinqerisht më të rehatshëm në një pozicion shumë më afër Liberal Demokratëve’.
Në të njëjtin program, deputeti konservator Sir Bernard Jenkin deklaroi:
‘Persona si Suella dhe Rob Jenrick po largohen nga Partia Konservatore pikërisht në momentin kur Kemi po i rregullon këto gjëra dhe po fillon të na ngrejë në sondazhe. Ndoshta po largohen sepse ajo po ecën më mirë.’
Kryetarja e Partisë Laburiste, Anna Turley, tha: ‘Nigel Farage po e mbush partinë e tij me konservatorë të dështuar, përgjegjës për kaosin dhe rënien që e mbajtën Britaninë mbrapa për 14 vjet.’
Zëvendësliderja e Liberal Demokratëve, Daisy Cooper, deklaroi se ‘Farage ka rekrutuar edhe një tjetër ministër konservator me amnezi selektive – një që ankohet për Britaninë e thyer, duke harruar me lehtësi se vetë ndihmoi në thyerjen e saj.’
