Ish-sekretarja e shtypit e Joe Biden, Jen Psaki, është përballur me një valë kritikash pasi komentoi me tone përçmuese ndaj zëvendëspresidentit amerikan JD Vance dhe bashkëshortes së tij, Usha, gjatë një interviste në një podkast.
Gjatë paraqitjes së saj të martën në podkastin “I’ve Had It”, Psaki, e cila aktualisht drejton një emision politik në MSNBC, u shpreh se Vance, i përfolur si një nga kandidatët e mundshëm për zgjedhjet presidenciale të vitit 2028, “dëshiron të bëhet president më shumë se çdo gjë tjetër” dhe është “i gatshëm të bëjë gjithçka për ta arritur këtë”.
Duke e quajtur Vance “më të frikshëm se Trump”, Psaki tha se ai është “një kameleon politik” që përshtatet me çdo audiencë. Por komenti që ndezi reagime të ashpra ishte ai për jetën familjare të politikanit republikan.
“Gjithmonë pyes veten çfarë po ndodh në mendjen e gruas së tij. Si për shembull: ‘Je mirë? Pulsit sytë katër herë. Eja këtu, do të të shpëtojmë’”, tha Psaki, duke nënkuptuar se bashkëshortja e Vance mund të ishte në një marrëdhënie të tensionuar.
Komentet e Psakit u dënuan menjëherë në rrjetet sociale dhe nga figura të Partisë Republikane. Drejtori i Komunikimit të Shtëpisë së Bardhë, Steven Cheung, e akuzoi atë se “po projekton çështjet e veta personale tek të tjerët”, duke e quajtur “Jen Psucki” dhe “një budallaqe që përpiqet të kompensojë mungesën e talentit duke shpikur gjëra”.
