Trajneri i Interit, Simone Inzaghi, pas eliminimit nga Kupa e Italisë, pranoi se ekipi i tij është i lodhur në këtë fazë të sezonit.
“Duhet t’i bëjmë komplimente Milanit sepse ka bërë një ndeshje të mirë. Ne kemi keqardhje për pjesën e parë, pasi meritonim më shumë dhe nuk ishim të aftë të shfrytëzonim rastet e krijuara. Në pjesën e dytë pësuam gol nga goditje këndi, ku ishim të gjithë të vendosur shumë mirë në mbulim.
Një top që mbeti në krahun e Barella… nuk ishim as me shumë fat. Por, qartësisht në pjesën e dytë kemi bërë shumë më pak sesa në të parën”, tha fillimisht Inzaghi.
Më tej, trajneri i zikaltërve pranoi lodhjen e skuadrës së tij, që deri dje po luftonte në të gjitha frontet e mundshme.
“Nuk jemi mësuar, janë dy humbje radhazi (Bologna dhe Milan). Duhet të tregohemi të aftë të rinisemi në mënyrën e duhur. Në Bolonjë, sipas meje, nuk meritonim të mundeshim, ndërsa sot në pjesën e dytë na mungonte energjia. Kemi lodhje fizike dhe mendore, është e kotë që ta fshehim.
Por, nuk duhet të jetë justifikim. Kemi pasur një kalendar më të ngjeshur se ekipet e tjera, por kemi vendosur ne vetë që ta bëjmë këtë itinerar që na ka dhënë shumë gëzime, por edhe ndonjë zhgënjim, si ky i sotmi. Nuk jemi mësuar të pësojmë dy humbje radhazi, do t’i analizojmë mirë”, tha Simone Inzaghi.
