Autoritetet panameze njoftuan të martën se kishin sekuestruar 12 ton kokainë, një sasi rekord në historinë e vendit, në një operacion të kryer në Oqeanin Paqësor.
Sipas prokurorit Julio Villarreal, operacioni u krye të hënën në një anije që ishte nisur nga Kolumbia për në Shtetet e Bashkuara. Dhjetë anëtarë të ekuipazhit u arrestuan, përfshirë venezuelas, ekuadoras dhe nikaraguanas.
Ky është sekuestrimi më i madh që nga viti 2007, kur 19 ton kokainë u sekuestruan në ujërat panameze në Paqësor, sipas autoriteteve, të cilat vitin e kaluar raportuan se kishin sekuestruar gjithsej 124 ton drogë.
Panamaja është një qendër për trafikimin e kokainës nga Amerika e Jugut, kryesisht nga Kolumbia fqinje, me destinacion Shtetet e Bashkuara. Në muajt e fundit, disa vende të Amerikës Latine janë përpjekur të nxjerrin në pah përpjekjet e tyre për të luftuar kartelet, në një kohë kur Shtëpia e Bardhë ka vendosur forca ushtarake në rajon me qëllimin e deklaruar për të luftuar trafikun e drogës.
Që nga fillimi i shtatorit, forcat amerikane kanë nisur sulme ajrore në Karaibe dhe Paqësor kundër anijeve që dyshohet se u përkasin trafikantëve të drogës. Deri më sot, Uashingtoni ka marrë përgjegjësinë për 20 sulme që kanë vrarë 76 persona, sipas një llogaritjeje nga Agjencia Franceze e Lajmeve bazuar në të dhënat e qeverisë amerikane.
Venezuela akuzon SHBA-në se po përdor luftën kundër karteleve të drogës si pretekst për të kryer një operacion që synon rrëzimin e Presidentit Nicolas Maduro dhe sekuestrimin e rezervave të naftës së vendit.
