Konferenca e Kryetarëve ka vendosur që ditën e premte (14 korrik) të zhvillohet seanca e posaçme në lidhje me kërkesën e SPAK për arrestimin e ish-zëvendëskryeministrit Arben Ahmetaj.
Seanca do të nisë në orën 10:00, ndërsa mbledhja e Konferencës së Kryetarëve erdhi pas debateve në Kuvend, ku opozita nuk lejoi zhvillimin e seancës sipas rendit të ditës, duke kërkuar që të futej kërkesa e SPAK për arrestimin e Ahmetajt.
Pas më shumë se 3 orë debatesh u vendos që të mblidhej Konferenca e Kryetarëve, për t’i dhënë zgjidhje situatës së krijuar në Kuvend. Në seancën e nesërme do të ketë dy raporte në lidhje me këtë çështje.
Në mbledhjen e (12 korrik) të Këshillit të Mandateve u ra dakord që t’i rekomandohet Kuvendit pranimi i kërkesës së SPAK, për arrestimin dhe kontrollin e banesës së Ahmetajt. Por palët nuk ishin në një mendje sa i takon kohës se kur seanca plenare do të shqyrtojë kërkesën e SPAK. Këshilli i Mandateve vendosi që të shqyrtohet më 17 korrik, ndërsa opozita kërkoi që të futet në rendin e ditës së seancës së djeshme.
Pas ndërprerjes së seancës në Kuvend 4 herë, në fund u ra dakord që Kuvendi të mblidhet me 14 Korrik për shqyrtimin e kërkesës së SPAK.
Kujtojmë se Ahmetaj ndodhet jashtë territorit të Shqipërisë, ndërsa avokatët e tij kanë deklaruar se është larguar për probleme personale, por pa dhënë të tjera detaje mbi vendin ku ndodhet aktualisht ish-zëvendëskryeministri.
Deri më tani ndaj ish-zëvendëskryeministrit Arben Ahmetaj janë ngritur tre akuza penale, korrupsion pasiv, pastrim parash dhe deklarim i rremë dhe fshehje pasurie.
Hetimi për ish zëvendës kryeministrin Arben Ahmetaj ka përfshirë edhe bisedat telefonike të tij të para 11 viteve. Nga këqyrja e tyre rezultoi se nga data 21 korrik 2012 deri në 10 tetor 2012, pra në gati tre muaj, të ketë patur 138 komunikime telefonike dhe 3287 mesazhe mes Ahmetaj dhe Mirel Mërtirit. Më pas SPAK thotë se janë faktuar edhe lidhjet mes Ahmetajt dhe Klodian Zotos, biznesmenit të inceneratorëve.
Sipas hetimeve rezulton që ai të ketë përfituar rreth 500 mijë euro përfitime të nisura që nga viti 2016 deri më 2020. Madje SPAK ka arritur të zbulojë edhe shkëmbime e-mailesh kur Zoto informohej mbi procedurat për inceneratorët. Në një nga këto e-maile del edhe emri i Alda Klosit, ish-sekretares së përgjithshme të Ministrisë së Financave.
