Kryeministri Edi Rama gjendet në Rekjavik, (Islandë), për të marrë pjesë në Samiti i Liderëve të Këshillit të Evropës. Lajmin e ka bërë të ditur vetë Rama në rrjetet sociale. Ai e ka shoqëruar këtë dhe me një foto me kryeministrin e Malit të Zi, Dritan Abazoviç.
Sikurse njofton e dërguara Dena Shkodrani, Samiti i katërt i Këshillit të Evropës ka në axhendë krijimin e një regjistri për të regjistruar dëmet e shkaktuara nga agresioni i Rusisë kundër Ukrainës dhe për të riafirmuar rëndësinë e vlerave thelbësore të Këshillit të Evropës.
Momenti për Samitin buron nga agresioni i Rusisë kundër Ukrainës dhe vullneti për të siguruar që Këshilli mund të vazhdojë të çojë përpara vlerat e tij thelbësore brenda kontinentit: të drejtat e njeriut, demokracinë dhe sundimin e ligjit.
Samiti organizohet nga Katrín Jakobsdóttir, Kryeministre e Islandës dhe Thórdís Kolbrún Reykfjörd Gylfadóttir, Ministër i Punëve të Jashtme të Islandës dhe President i Komitetit të Ministrave të Këshillit të Evropës.
Kryeministri Rama do te moderoje tryezen me temë “Përballja me sfidat e reja dhe në zhvillim të të drejtave të njeriut – e ardhmja është këtu”.
