Ish-ministri i Shëndetësisë, Uran Ismaili, ka thënë se Qeveria ka neglizhuar marrjen e masave të rrepta për parandalimin e koronavirusit.
Përmes një postimi në Facebook, Ismaili ka thënë se është lejuar qarkullimi i lirë i personave që kanë ardhur nga vendet me rrezik të lartë.
Ismaili ka thënë se “ky dështim rezulton në shpërndarjen e virusit në komuna të ndryshme”.
“E di se në një klimë të rënduar, si kjo që kemi tash me Coronavirus, është shumë e vështirë të depërtojë e vërteta, sepse më me dëshirë priten lajmet e mira sesa pranimi i informatave të sakta dhe kritikave e i sugjerimeve.
Por unë do të vazhdoj të flas edhe më tutje për mënyrën se si duhet vepruar në këtë situatë, që të mund të shpëtohen jetë njerëzish dhe që Kosova të ketë pasoja sa më të vogla shëndetësore dhe ekonomike”, ka thënë ai.
Ismaili tutje ka paraqitur tre hapa të cilët sipas tij, Qeveria Kurti nuk i ka bërë ende, e duhet t’i ndërmarrë urgjentisht.
Ai ka kërkuar që personat të cilët vijnë nga vendet e prekura me koronavirus të vihen në karantinë.
“Kufizim i personave: Nuk është se po e kërkoj sot. E kam kërkuar edhe para tri javësh, në Komisionin Parlamentar për Shëndetësi, kur Coronavirusi kishte prekur Evropën. Nuk është bërë një gjë e tillë dhe ky ishte gabim. Është e domosdoshme që personat të cilët vijnë nga shtetet tjera – të vihen në karantinë dhe t’u ofrohet mbështetje. Po ashtu, menjëherë të identifikohen personat që potencialisht kanë pasur kontakt me të prekurit nga virusi dhe edhe ata të vendosen në vetë-izolim të detyrueshëm dhe t’u ofrohet mbështetje. Kështu pamundësohet përhapja e sëmundjes. Qeveria duhet ta përmirësojë këtë gabim, urgjentisht”, ka shkruar ai.
Ismaili ka kërkuar të bëhen teste agresive, në mënyrë, që sipas tij, të identifikohen qytetarët potencialisht të prekur nga koronavirusi.
“Testime agresive. Të fillohet testim agresiv, i shpeshtë, në mënyrë që të identifikohen qytetarët potencialisht të prekur nga virusi, për ta thyer kështu zinxhirin infektues. Qeveria të mos e bëjë gabimin e dytë. Ka raste kur jo Pacienti 0 (pacienti i parë që identifikohet me virus), por Pacienti 31 ka qenë shpërndarësi masiv i virusit, siç ka ndodhur në Korenë e Jugut. Prandaj, Qeveria duhet të krijojë mundësi për testimin agresiv dhe të zbulohen e izolohen rastet. Secili rast mund të jetë Pacienti 31. Testimi agresiv shpëton jetë”, ka thënë ai.
Si masë të tretë, ai ka kërkuar mbrojtje për personelin mjekësor.
“Personeli mjekësor duhet të mbrohet. Me çdo mjet. Ata janë pjesa më vitale në këtë luftë, në bashkëpunim me qytetarët. Qeveria duhet të veprojë sa më parë për t’u krijuar atyre kushtet e duhura për punë”, ka përfunduar Ismaili.
