Të paktën 21 persona kanë humbur jetën në Itali dhe mbi 18 të tjerë kanë mbetur të plagosur, pasi një autobus doli nga rruga dhe ra nga mbikalimi.
Ngjarje e rëndë u regjistrua në Mestre, provincë e Venecias, ndërsa disa persona rezultojnë të zhdukur.
Sipas “La Republica“, automjeti i aksidentuar ka rënë nga rreth 30 metra lartësi duke përfunduar mbi shinat e trenit dhe më pas ka marrë flakë nga përplasja. Rrethanat e aksidentit nuk dihen ende, ndërsa automjeti po transportonte turistë që kishin qëndruar në një kamping. Linja hekurudhore mes Mestres dhe Venecias u pezullua për shkak të aksidentit.
Pesë prej të plagosurve, mes tyre dy të mitur ndodhen në spitalin e Trevisos, ndërsa një tjetër i mitur është transportuar me ambulancë në spitalin e Padovës. 12 të tjerat ndodhen në Mestre. Viktimat ende nuk janë identifikuar, por dyshohet se janë turistë të huaj të kombësive të ndryshme.
Kryetari i bashkisë së Venecias, Luigi Brugnaro shpalli qytetin në zi.
“Një tragjedi e madhe goditi komunitetin tonë këtë mbrëmje. Unë menjëherë shpalla qytetin në zi, në kujtim të viktimave të shumta që ishin në autobusin e rënë. Një skenë apokaliptike, nuk ka fjalë”, u shpreh ai.
Kryeministrja Giorga Meloni po ashtu reagoi duke shprehur ngushëllime.
“Shpreh ngushëllimet e mia më të thella, personale dhe të gjithë qeverisë, për aksidentin e rëndë që ndodhi në Mestre. Mendimet e mia shkojnë tek viktimat, familja dhe miqtë e tyre. Jam në kontakt të ngushtë me kryebashkiakun Luigi Brugnaro dhe me ministrin Matteo Piantedosi për ndjekjen e lajmeve mbi këtë tragjedi”, tha Meloni.
