Pasi punoi për disa vite në Shqipëri si mësuese Dhurata Tusha vendosi të emigrojë në Itali. Si shumë bashkëkombas atje vazhdoi shkollimin, ku arriti të integrohej mjaftueshëm, dhe sot është mësuese dhe ndërmjetëse (mediatrice) e gjuhës dhe kulturës shqipe që Merano dhe zonat rreth saj.
Por përveçse aktivitetit si mësues Tusha është shumë aktive ne komunitet. Vitin e kaluar mori pjesë në garën për këshilltar bashkiak, të cilën e humbi për pak vota ndërsa këtë shtator rikthehet të kandidojë sërish për të njëjtin pozicion këshilltari.
“Pranova të bëhem pjesë e kësaj sfide me një përgjegjësi dhe ndërgjegje që përfaqësoj një komunitet që dëshiron barazinë, punon për integrim e dëshiron një të ardhme më të mirë. Puna dhe detyrimet e mia kanë qenë dhe do vazhdojnë të jenë në maksimum. Ku përparësia jonë janë fëmijët e kopshteve, nxënësit e shkollave, individi dhe familjet në nevojë. Të gjitha këto mund të realizohen vetëm duke pasur mbështetjen tuaj”, shprehet Dhurata Tusha.
Duke i ftuar të gjithë bashkatdhetarët të votojnë në datat 20- 21 Shtator Tusha në rrjetet sociale shkruan: “Të nderuar bashkatdhetarë, qytetarë, banorë në Merano e Sinigo, shokë, miq e familjarë kudo që ndodheni!
Dua të ndaj me ju lajmin e kandidaturës sime si anëtare e këshillit të Komunës Merano me partinë Alleanza per Merano, për të zgjedhur kryetarin e saj Av. Dario Dal Medico.
Doja ta ndaja lajmin me ju sepse ju në zgjedhjet e shtatorit të vitit të kaluar më dërguat kaq pranë fitores. Vetëm 17 vota larg saj.
Ishte hera e parë që të gjithë ne bëmë të tronditej politika e qytetit tonë.
Për herë të parë i bëmë të mendojnë e të reflektojnë që edhe në komunën tonë ka një komunitet që është integruar e po integrohet çdo ditë. Ishte hera e parë që jo vetëm një qytetar që e ka origjinën nga një shtet tjetër, por mbi të gjitha një femër e të ishte aq pranë fitores.
Ne mposhtëm çdo paragjykim. Ne i bëmë të mendojnë e të reflektojnë për çdo qytetar të këtij qyteti.
Atje më dërguat ju! Ju vlerësuat seriozitetin, punën, intelektin, ambicien, vullnetin dhe idetë e mia. Ju më mbështetët, më dhatë forcë e kurajo, më dhatë besimin që së bashku mund të arrijmë kudo. Prandaj do i drejtohem çdo qytetari që t’i vlerësojë këto votime për fëmijët, për të rinjtë, për veten, për prindërit. Kjo është mundësia më e mirë për të pasur një zë, forcë, integrim e një të ardhme. Çdo njëri nga ne duhet të kontribuojë e të reflektojë për të ardhmen tonë.
Duhet t’u themi jo interesave maniake partiake e vetiake dhe të bëjmë më të mirën sot për çdo njërin nga ne për të arritur atje ku duam të arrijmë nesër.
Të bashkuar ne mund të arrijmë në fitore. Vlerësojeni veten dhe votën tuaj, vlerësojeni të ardhmen. Me besimin dhe përkrahjen tuaj dhe punën time do arrijmë atje ku duhet te jemi.
Me respekt e dashuri
