Një 35-vjeçare shqiptare në Itali është qëlluar për vdekje nga bashkëshorti i saj. Mediet italiane raportojnë se Klodiana Vefa, nënë e dy fëmijëve, u qëllua me armë nga bashkëshorti i saj me të cilin kishte kohë që nuk jetonin bashkë, pak metra larg shtëpisë së saj.
Ngjarja ndodhi mbrëmjen e djeshme në rrugën “Galvani” në Kastelfiorentino (Firence) teksa 35-vjeçarja po kthehej nga puna në shtëpi.
Alarmi u ngrit nga disa banorë të rrugës të cilët kanë dëgjuar shkrepjen e armës.
Ambulanca mbërriti menjëherë në vendngjarje, por 35-vjeçarja nuk arriti t’i shpëtonte plagëve të marra.
Policia është vënë në ndjekje të autorit të ngjarjes, i cili pas krimit është arratisur duke marrë me vete edhe armën me të cilën qëlloi.
Pikat e kontrollit u aktivizuan nga policia përgjatë rrugëve të mundshme të arratisjes dhe kërkimet u shtrinë në Valdelsa, zonën e Pogibonsit dhe Empoli.
Kryetari i bashkisë Castelfiorentino, Alesio Falorni (Alessio), i cili mbërriti ndër të parët në vendin e tragjedisë, shkroi më pas në rrjetet sociale: “Fatkeqësisht një fatkeqësi ka ndodhur së fundmi në Castelfiorentino, zona Puppino. Një vajzë është vrarë me sa duket pas një debati. Është me të vërtetë shumë herët për të zbuluar informacione mbi ngjarjen dhe për të diskutuar hipotezat të cilat ende po shqyrtohen nga policia. Është një moment heshtjeje dhe tubimi rreth një familjeje të prekur nga një ngjarje e tmerrshme”.
