Autoritetet policore në Itali kanë arrestuar tre persona, të cilët dyshohen si autorë të vrasjes së një personi me origjinë turke, i cili u gjet i karbonizuar më 23 korrik në një apartament në Sesto San Giovanni, në provincën e Milanos.
Mediat përtej Adriatikut raportojnë se në pranga kanë përfunduar një burrë italian, një grua italiane dhe një shqiptar, të cilët akuzohen se kanë goditur 62-vjeçarin me thikë rreth 30 herë. Më pas autorët e sulmit u përpoqën të shkatërronin provat duke i vënë flakën trupit dhe apartamentit.
Duke analizuar pamjet e kamerave të sigurisë, të dhënat telefonike dhe përgjimet telefonike, hetuesit arritën të rindërtonin lëvizjet e autorëve, duke identifikuar rolet e tyre të ndryshme natën e vrasjes.
Shqiptari dhe italiani u dërguan në burgun Busto Arsizio, ndërsa gruaja në burgun e Milanos, në pritje të masës së sigurisë.
Viktima, Hayati Aroyo ishte kunati i bosit të mafias turke Huseyin Sarai, i cili u vra në Crotone më 31 janar 2005. Megjithatë, vrasja e tij nuk ishte e lidhur me aktivitetet kriminale të familjes.
Identiteti i Hayati Aroyos u konfirmua disa ditë më vonë. Hetuesit përdorën gjurmët e gishtërinjve për ta identifikuar. Viktima qëndronte në një apartament që i ishte dhënë me qira nga një student 20-vjeçar, i cili kishte shkuar me pushime për dy muaj.
