Ditën e sotme ministri i Jashtëm izraelit, Yair Lapid u bëri thirrje shtetasve izraelitë që ndodhen në Turqi të largohen nga ky vend sa më shpejt të jetë e mundur, nga frika e sulmeve iraniane.
‘Pas një serie sulmesh terroriste iraniane në javët e fundit kundër izraelitëve që po pushojnë në Stamboll, ne u bëjmë thirrje izraelitëve që të mos fluturojnë drejt qytetit turk dhe nëse jeni tashmë atje, kthehuni në Izrael sa më shpejt të jetë e mundur’.
Javët e fundit, shtypi izraelit ka raportuar për tentativa sulmesh kundër izraelitëve në Turqi, duke cituar burime që kanë kërkuar anonimatin.
Këto sulme janë penguar falë një bashkëpunimi midis shërbimeve të sigurisë izraelite dhe turke, pasi dy vendet i kanë forcuar marrëdhëniet e tyre muajt e fundit.
