Ushtria e Izraelit tha se një komandant i saj e ka qëlluar për vdekje një palestinez që u përpoq t’i therte ushtarët të martën në Bregun e pushtuar Perëndimor.
Përmes një deklarate, forcat e armatosura izraelite thanë se incidenti ndodhi në një lidhje rrugësh në jug të qytetit palestinez, Nablus, shkruan Reuters.
Trupat izraelite në një pikë të afërt ushtarake e vërejtën sulmuesin që u përpoq t’i therte dy ushtarë. Njëri nga ushtarët i bllokoi sulmet e shumta me thikë të sulmuesit dhe komandanti i trupave që ishte në vendin e ngjarjes hapi zjarr ndaj sulmuesit dhe e neutralizoi atë”, thuhet në deklaratë.
Ministria e Shëndetësisë e Palestinës vetëm konfirmoi se burri i qëlluar me armë ka vdekur, pa e publikuar identitetin e tij.
Ndryshe, Izraeli e pushtoi Bregun Perëndimor në Luftën e Lindjes së Mesme më 1967. Palestinezët e kërkojnë këtë territor për një shtet të pavarur që shpresojnë ta ndërtojnë në Bregun Perëndimor, Gaza dhe Jerusalemin Lindor.
